Եվրահանձնակատարը չեղարկել է այցը Թուրքիա՝ ի նշան Իմամօղլուի ձերբակալության դեմ բողոքի

Եվրախորհրդարանը Ստրասբուրգում նիստ է անցկացրել «Ժողովրդավարական ճնշումները Թուրքիայում և Էքրեմ Իմամօղլուի ձերբակալությունը» թեմայով։ Իր ելույթում  ունենալով նիստում ԵՄ ընդլայնման  հարցերով եվրահանձնակատար Մարտա Կոսը բարձրաձայնել է Եվրամիության խիստ մտահոգությունը Ստամբուլի ընդդիմադիր քաղաքապետ Էքրեմ Իմամօղլուի ձերբակալության կապակցությամբ և հայտնել, որ  չեղարկում է առաջիկա այցերը Թուրքիա։

Նա նշել է, որ չեղյալ է հայտարարել իր մասնակցությունը ապրիլի 11-ից 13-ը կայանալիք Անթալիայի դիվանագիտական ​​ֆորումին և չի մեկնի Անկարա՝ հանդիպելու Թուրքիայի արտգործնախարար Հաքան Ֆիդանի հետ։

Եվրահանձնակատարն ասել է, որ որպես ԵՄ անդամության թեկնածու երկիր և Եվրոպայի խորհրդի անդամ՝ ակնկալվում է, որ Թուրքիան կկիրառի ամենաբարձր ժողովրդավարական չափանիշներն ու գործելակերպը, ներառյալ՝ հավաքների ազատությունը, մամուլի ազատությունը և ազատ ու արդար ընտրությունները: Կոսը կոչ է արել չմիջամտել ցույցերին՝ ասելով, որ իրավական միջամտությունը լուրջ հարցեր է առաջացնում, քանի որ Իմամօղլուն պատրաստվում է առաջադրվել նախագահական ընտրություններում։

Ուշադրություն հրավիրելով ՆԱՏՕ-ին Թուրքիայի անդամակցության և աշխարհաքաղաքական կարևորության վրա՝ նա ասել է, որ ԵՄ-ի կողմից Թուրքիայի հետ հարաբերությունների խզումը ոչ ոքի օգուտ չի բերի։ Ընդգծելով, որ Թուրքիան ռազմավարական գործընկեր է, Կոսն անդրադարձել է համագործակցության շարունակման կարևորությանը։

Թուրքիա-ԵՄ Խառը խորհրդարանական հանձնաժողովի Եվրախորհրդարանի թևի նախագահ Էմանուիլ Քեֆալոգանիսը հայտարարել է, որ իրենք չեն կարող լռել Թուրքիայում տեղի ունեցող զարգացումների մասին և հայտարարել, որ չեղյալ են հայտարարել հանդիպումը, որը նախատեսված էր անցկացնել այս տարվա ապրիլի 14-15-ը։ Եվրախորհրդարանի Թուրքիայի հարցերով զեկուցող Նաչո Սանչես Ամորն էլ նշել է, որ Թուրքիան, ԵՄ-ին ինտեգրման ճանապարհով առաջ գնալու փոխարեն, հետ է գնում, և հիշեցրել, որ ԵՄ-ի կողմից սահմանված ժողովրդավարական չափանիշները պետք է պահպանվեն։

Հիշեցնենք, որ Ստամբուլի ընդդիմադիր քաղաքապետ Էքրեմ Իմամօղլուն ձերբակալվել է մարտի 19-ին, օրեր անց՝ կալանավորվել։ Ժողովրդահանրապետական ​​կուսակցությունն Իմամօղլուին առաջադրել է որպես նախագահի թեկնածու առաջիկա ընտրություններում, որոնք նախատեսվում է անցկացնել 2028 թվականին։ Ստամբուլի քաղաքապետի ձերբակալությունը հանգեցրել է զանգվածային բողոքի ցույցերի Թուրքիայիում։

Թարգմանությունը՝ Էմմա Չոբանյանի