07.12.2025 | 21:40
Վարդենյաց լեռնանցքում ձյուն է տեղում. Դիլիջանի, Սպիտակի ոլորաններում մառախուղ է
Թրամփը ՀՀ-ի համար 10 % մաքսատուրք է սահմանել․ ԱՄՆ-ն «առևտրային պատերազմ» է հայտարարում ամբողջ աշխարհին
Քաղաքականություն
03.04.2025 | 09:44
ԱՄՆ նախագահ Դոնալդ Թրամփը, ելույթ ունենալով Սպիտակ տան Վարդերի պարտեզում, հայտարարել է, որ մաքսատուրքեր է սահմանում ԱՄՆ ներմուծվող ապրանքների վրա՝ ապրիլի 2-ն անվանելով «Ազատագրման օր», գրում է CNN-ը։
Թրամփը հայտարարել է, որ «սա ամենակարևոր օրերից մեկն է» ամերիկյան պատմության մեջ։ «Դա մեր տնտեսական անկախության հռչակագիրն է», – ասել է Թրամփը Վարդերի պարտեզում միջոցառման ժամանակ՝ հայտարարելով նոր միջոցառումների մասին:
Նա նշել է, որ Միացյալ Նահանգները մաքսատուրքերից գոյացած գումարները կօգտագործի «հարկերը նվազեցնելու և պետական պարտքը մարելու համար»:
«Տարիներ շարունակ աշխատասեր ամերիկացիները ստիպված են եղել կողք կողքի նստել, մինչդեռ մյուս երկրները հարստացել և հզորացել են՝ հիմնականում մեր հաշվին: Բայց հիմա բարգավաճման մեր հերթն է»,- ասել է Թրամփը՝ նշելով, թե մաքսատուրքերը կհանգեցնեն Միացյալ Նահանգներում ավելի շատ արտադրության, ինչը «կնշանակի ավելի մեծ մրցակցություն և ցածր գներ սպառողների համար»:
Իր ելույթի ընթացքում Թրամփը ցույց է տվել աղյուսակը, որտեղ ներկայացված է երկրների ցանկը և տուրքերի չափը, որոնք սահմանվում են։
Վաշինգտոնը Եվրամիությունից ներմուծվող ապրանքների համար մաքսատուրքեր է սահմանում 20 տոկոսի չափով, Չինաստանի համար մաքսատուրքը կկազմի 34 տոկոս, Մեծ Բրիտանիայի համար՝ 10 տոկոս, Ճապոնիայի համար՝ 24, Հնդկաստանի համար՝ 26 տոկոս։
Տուրքերի նվազագույն շեմը կազմում է 10 տոկոս: Ըստ Թրամփի հրապարակած ցուցակի՝ մաքսատուրքերը չեն շրջանցել նաև Հայաստանը։ ՀՀ-ից ներկրվող ապրանքների համար դրանք կազմում են 10 տոկոս։ Վրաստանի, Ադրբեջանի ու Թուրքիայի, Իրանի համար ևս սահմանված է 10 տոկոս տուրք։
Ուշագրավ է, որ ցուցակում ներառված չեն ՌԴ-ն, Բելառուսը, Հյուսիսային Կորեան, Մեքսիկան, Կանադան, Կուբան, Սոմալին ու Բուրկինա Ֆասոն։
Թրամփն նաև ասել է, որ Միացյալ Նահանգները 25 տոկոս մաքսատուրք կսահմանի արտասահմանյան արտադրության բոլոր մեքենաների վրա։ Նոր կարգավորումն ուժի մեջ կմտնի կեսգիշերին։
«Այսօր մենք պաշտպանում ենք ամերիկացի աշխատավորներին և վերջապես առաջին տեղում ենք դնում Ամերիկան»,- ասել է Թրամփը նախքան փոխադարձ տուրքերի պլանը ստորագրելը:
Թարգմանությունը՝ Էմմա Չոբանյանի
