25.05.2026 | 00:01
Մայիսի 25-ի վաղ առավոտյան ՀՀ ԶՈւ ավիացիան Երևանի կենտրոնում կատարելու է թռիչք․ ՊՆ
Թուրքիան փորձում է վերահսկողության տակ առնել Սիրիայի T4 ռազմավարական ավիաբազան` չնայած Իսրայելի վերջին հարվածներին
Քաղաքականություն
02.04.2025 | 23:07
Թուրքիան ջանքեր է գործադրում՝ վերահսկողության տակ առնելու սիրիական Tiyas ավիաբազան, որը նաև հայտնի է որպես T4, և պատրաստվում է այնտեղ տեղակայել հակաօդային պաշտպանության համակարգեր։ Այս մասին Middle East Eye-ին հայտնել են իրավիճակին ծանոթ աղբյուրները:
Հաղորդվում է, որ շինարարական ծրագրերը նույնպես ընթացքի մեջ են:
Անկարան և Դամասկոսը պաշտպանական պայմանագրի շուրջ բանակցում են դեկտեմբերից՝ Սիրիայի նախկին նախագահ Բաշար Ասադի տապալումից հետո։ Համաձայնագիրը նախատեսում է, որ Թուրքիան օդային ծածկույթ և ռազմական պաշտպանություն կապահովի Սիրիայի նոր կառավարությանը, որը ներկայում չունի գործող բանակ:
Մինչ Իսրայելը Սիրիայում թուրքական ռազմական ներկայությունը դիտարկում է որպես պոտենցիալ սպառնալիք՝ Անկարան նպատակ ունի կայունացնել երկիրը՝ օգտագործելով իր ռազմական հնարավորությունները և լրացնելով ուժային վակուումը, որը մնացել է Ռուսաստանի և Իրանի դուրս գալուց հետո, ասել են պարբերականի աղբյուրները։ Թուրքիան նաև մտադիր է ուժեղացնել պայքարը ԻԼԻՊ-ի դեմ, որը Միացյալ Նահանգների համար կարևոր պայման է տարածաշրջանից զորքերը դուրս բերելու համար։
Աղբյուրը MEE-ին ասել է, որ Թուրքիան սկսել է քայլեր ձեռնարկել՝ հսկողության տակ առնելու T4 ավիաբազան, որը գտնվում է կենտրոնական Սիրիայում՝ Պալմիրայի մերձակայքում:
«Hisar տիպի հակաօդային պաշտպանության համակարգ կտեղակայվի T4-ում՝ բազայի օդային ծածկույթ ապահովելու համար»,- ասել է աղբյուրը:
Համակարգը տեղադրվելուց հետո բազան կվերակառուցվի և կընդլայնվի անհրաժեշտ հարմարություններով: Անկարան նաև նախատեսում է տեղակայել հետախուզական և զինված անօդաչու թռչող սարքեր, այդ թվում՝ ուժեղացված հարվածային կարողություններ։ Աղբյուրը հավելել է, որ բազան կօգնի Թուրքիային օդային վերահսկողություն հաստատել տարածաշրջանի վրա։
Երկրորդ աղբյուրը նշել է, որ թուրքական հակաօդային պաշտպանության համակարգերի և անօդաչու թռչող սարքերի առկայությունը, հավանաբար, կխանգարի Իսրայելին օդային հարվածներ հասցնել այդ տարածքում:
Թուրքիայի պաշտպանության նախարարությունը հրաժարվել է մեկնաբանություններից։
Ասադի կառավարության տապալումից ի վեր Իսրայելը պարբերաբար թիրախավորում է սիրիական ռազմական օբյեկտները։ Անցյալ շաբաթ իսրայելական օդուժը հարվածներ է հասցրել T4-ին և Պալմիրայի ավիաբազային՝ թիրախավորելով թռիչքուղիներն ու ռազմավարական օբյեկտները:
Իսրայելական անվտանգության աղբյուրը լրատվամիջոցներին ասել է, որ Սիրիայում թուրքական ցանկացած ավիաբազա կխաթարի Իսրայելի գործողությունների ազատությունը:
«Սա պոտենցիալ սպառնալիք է, որին մենք դեմ ենք»,- ասել է նա։
MEE-ի առաջին աղբյուրը նաև ասել է, որ Անկարան դիտարկում է C-400 հակաօդային պաշտպանության համակարգերի ժամանակավոր տեղակայումը T4-ում կամ Պալմիրայում՝ վերակառուցման աշխատանքների ընթացքում օդային տարածքի անվտանգությունն ապահովելու համար: Սակայն վերջնական որոշում դեռ կայացված չէ, և Ռուսաստանը պետք է տա իր հավանությունը։
Թարգմանությունը՝ Էմմա Չոբանյանի
