Քաղաքականություն
01.02.2022 | 21:022021 թվականի նոյեմբերի 16-ին մարտական գործողությունների ընթացքում գերեվերված և Հայաստան վերադառնալուց հետո կալանավորված երեք զինծառայողների մասով նախաքննությունն ավարտվել է, գործն ուղարկվել է դատարան:
Տեղեկությունը հայտնում է ՔԿ-ն՝ մանրամասնելով, որ խոսքը զորամասի գումարտակի հրամանատարի պաշտոնակատարի պարտականությունները կատարող, մայոր Գ.Գ.-ի, նույն զորամասի հրամանատարի տեղակալ, մայոր Ն.Ե-ի և պայմանագրային զինծառայող, շարքային Ս.Մ.-ի մասին է: Արգիշտի Քյարամյանի ղեկավարած կառույցն այս զինծառայողներին մեղադրանք է առաջադրել Քրեական օրենսգրքի 365-րդ հոդվածի 3-րդ մասով, այն է՝ մարտական հերթապահություն կամ մարտական ծառայություն կրելու կանոնները խախտելը: Նրանց նկատմամբ խափանման միջոց է կիրառվել կալանավորումը։
Նոյեմբերի 16-ին հայ-ադրբեջանական սահմանին տեղի ունեցած արյունալի մարտական գործողությունների ընթացքում հայկական կողմն ունեցավ վեց զոհ: Նիկոլ Փաշինյանն ավելի ուշ հայտարարեց, որ այդ օրը հայկական կողմից գերեվարվել է 32 զինծառայող, նրանցից 8-ը մեղադրյալի կարգավիճակում է, իսկ 6-ը դեռ չի վերադարձել հայրենիք: ՔԿ-ի փոխանցմամբ՝ զինծառայողների անգործության հետևանքով ադրբեջանցիները գրավել են հրամանատարական դիտակետ հանդիսացող N մարտական դիրքը:
Զինվորների խնդիրներով զբաղվող իրավապաշտպան Ժաննա Ալեքսանյանն անհամաչափ է համարում գերությունից վերադարձած զինծառայողների կալանավորումը: Իրավապաշտպանի խոսքով՝ տպավորություն է, որ իրավապահ համակարգը Փաշինյանի հայտարարությունից հետո փորձում է պատժել գերիներին: Հիշեցնենք՝ նախորդ տարի նոյեմբերին Նիկոլ Փաշինյանն ԱԺ ամբիոնից հայտարարեց՝ պետք է պարզել զինծառայողների գերեվարվելու հիմքերն ու նրանց պատասխանատվության ենթարկել:
Քաղաքագետ Անդրիաս Ղուկասյանը շեշտում է՝ գերությունից վերադարձածներին կալանավորելու և դատելու ֆոնին կարևորագույն հարցի պատասխան չի տրվում՝ արդյո՞ք քննություն իրականացվել է՝ պարզելու, թե մարտական դիրքերն ըստ անհրաժեշտության կահավորված եղե՞լ են, որպեսզի զինծառայողները կարողանային անհրաժեշտ պաշտպանություն իրականացնել:
Ըստ Ղուկասյանի՝ առաջնագծում պետք է օգտագործվեն տեխնիկական միջոցներ, սակայն իշխանություններն օգտագործում են մարդկանց: Քաղաքագետը նաև անհիմն է համարում իրավապահների այն պնդումները, թե զինծառայողներն ազատության մեջ լինելով՝ կխոչընդոտեին գործի ընթացքին:
Ուշագրավ է, որ Երևանի ընդհանուր իրավասության դատարանն այսօր մերժել է նոյեմբերի 26-ին ադրբեջանական գերությունից վերադարձած ենթասպա Արեն Արամյանի կալանքի ժամկետը երկարաձգելու՝ դատախազության միջնորդությունը: Արամյանն ազատության մեջ կլինի փետրվարի 6-ից, եթե նախաքննական մարմինը չբողոքարկի դատարանի որոշումը: Այդ օրը կալանքից կազատվի գերությունից վերադարձած մեկ այլ զինծառայող ևս՝ Սերժիկ Ամիրխանյանը:
Մանրամասները՝ տեսանյութում։
Նարեկ Կիրակոսյան
