Հայաստանի քաղաքացիները միջազգային լրատվամիջոցներին ավելի շատ են վստահում․ ի՞նչ են փաստում թվերը. ՏԵՍԱՆՅՈւԹ

Հայաստանում հարցվածների 16%-ը վստահում է միջազգային մեդիա աղբյուրներին, հայկական և ռուսական մեդիա աղբյուրներին լիովին վստահության ցուցանիշը նույնն է՝ 13%: Այս մասին փաստում է նախորդ տարվա սեպտեմբերին Հայաստանի 1,213 քաղաքացիների շրջանում անցկացված հարցումը, որն ուղղված է եղել բացահայտելու ավանդական և սոցիալական մեդիայից տեղեկատվության ստացման հիմնական աղբյուրները, վերաբերմունքը բարեփոխումների լուսաբանմանը, տեղեկատվության հուսալիության ընկալումները և քաղաքացիների մեդիագրագիտությունը։ 

Հետազոտությունն իրականացվել է Մեդիա նախաձեռնությունների և Հետազոտական ռեսուրսների կովկասյան կենտրոն-Հայաստանի կողմից։ 

Ըստ հետազոտության արդյունքների՝ քաղաքացիներն ամենաանկախը համարում են միջազգային լրատվամիջոցներին, դրան հաջորդում է տեղական ռադիոն։ Հայաստանյան ռադիոյի և միջազգային հեռուստաալիքների լսարանները հիմնականում վստահում են դրանց անկախությանը և տեղեկության հավաստիությանը, գոհ են լրագրողների մասնագիտական որակներից։ Անկախության ցածր ցուցանիշ ունի հեռուստատեսությունը (տեղական և հանրապետական), տեղեկության հավաստիության և լրագրողների պրոֆեսիոնալիզմի ցածր ցուցանիշներ՝ ռուսական և հայկական առցանց ռեսուրսները, սոցիալական ցանցերը։

Բանախոսները նշեցին՝ ուշագրավ է այն հանգամանքը, որ 2021 թվականին ավելի շատ մեդիա սպառողներ են պատրաստ վճարել արժանահավատ և հավաստի տեղեկություն ստանալու համար, քան 2019 թվականին (13% և 6%)։ Այժմ որևէ վճարովի առցանց ռեսուրսի բաժանորդագրված է հարցվածների 4%-ը (1%՝ 2019-ին)։

Վճարելու պատրաստակամություն հայտնածների մեծամասնությունն այսպիսի ռեսուրսի բաժանորդագրության համար պատրաստ է վճարել ոչ ավելի, քան 4,000 դրամ:

Մանրամասները՝ տեսանյութում։