Չեմ կարծում, որ «Զանգեզուրի միջանցքը» կարող է հանգեցնել նոր պատերազմի. Ալիևի ներկայացուցիչ

Ադրբեջանի նախագահ Իլհամ Ալիևի հատուկ հանձնարարությունների գծով ներկայացուցիչ Էլչին Ամիրբեկովը հունգարական Magyar Nemzet պարբերականին տված հարցազրույցում հայտարարել է, թե, այսպես կոչված, «Զանգեզուրի միջանցքի» բացումը նախագիծ է, որը Բաքուն համարում է շահավետ բոլոր կողմերի համար։

«Մեզ համար կարևոր է, քանի որ այն կապ կապահովի Ադրբեջանի հիմնական մասի և Նախիջևանի միջև։ Իսկ Հայաստանն իր հերթին հնարավորություն կունենա վերջ դնել տարածաշրջանում մեկուսացմանը։ Երևանը կկարողանա միանալ տնտեսական համագործակցությանն ավելի լայն տարածաշրջանում: «Զանգեզուրի միջանցքը» նաև այլընտրանքային երթուղի է Միջին միջանցքին, որը կապում է Ասիան Եվրոպայի հետ, ուստի այն կարևոր է նաև տարածաշրջանի այլ երկրների համար։ Թուրքիան աջակցում է «Զանգեզուրի միջանցքի» բացմանը, իսկ Ռուսաստանը հայտնել է իր հետաքրքրությունը։ Ես վստահ եմ, որ միջանցքի բացումը բխում է նաև Իրանի շահերից, ուստի չեմ կարծում, որ «Զանգեզուրի միջանցքը» կարող է հանգեցնել նոր պատերազմի։ Դա թույլ կտա ընդլայնել տնտեսական համագործակցությունը Հայաստանի և Ադրբեջանի միջև, ինչը վստահության ամրապնդման կարևոր գործոն կլիներ»,- ասել է Ամիրբեկովը։

Ըստ ադրբեջանցի պաշտոնյայի՝ Հայաստանի հետ խաղաղության համաձայնագրի ստորագրման համար պետք է նախ ավարտել աշխատանքը դրա տեքստի վրա:

«Մենք դրական ենք գնահատում տեքստում մնացած որոշ բաց հարցերի շուրջ համաձայնության հասնելու հեռանկարները։ Խաղաղ գործընթացի հաջող ավարտի հիմնական խոչընդոտը Ադրբեջանի նկատմամբ շարունակվող տարածքային պահանջներն են, որոնք ամրագրված են Հայաստանի Սահմանադրության մեջ։ Խաղաղության կայունության և անշրջելիության համար Հայաստանը պետք է համապատասխան փոփոխություններ կատարի իր հիմնարար օրենքում, որպեսզի մեկընդմիշտ վերացնի իր պահանջներն Ադրբեջանի Ղարաբաղի տարածաշրջանի նկատմամբ։ Այսօր իսկապես շատ լավ հնարավորություններ կան համաձայնության գալու, բայց գնդակը հայկական կողմում է, որը պետք է ճիշտ որոշում կայացնի»,- հայտարարել է Ամիրբեկովը։

Թարգմանությունը՝ Էմմա Չոբանյանի