10.10.2026 | 18:18
ԶՈՒ ԳՇ պետն այցելել է մի շարք զորամասեր
Թուրքիայի ռազմարդյունաբերական համալիրը ռեկորդային՝ ավելի քան 3 մլրդ դոլարի արտադրանք է արտահանել․ «Բայրաքթար»-ի գնման պայմանագիր կա 16 երկրի հետ
Քաղաքականություն
24.01.2022 | 13:50
Թուրքիայի ռազմարդյունաբերական համալիրը 2021 թվականին արտահանման ռեկորդային ցուցանիշների է հասել․ հինգ տարվա ընթացքում երկիրը մտադիր է այդ ոլորտում աշխարհի առաջատար արտահանողների տասնյակում ներառվել։ Այս մասին «Անադոլու» գործակալության հետ զրույցում ասել է SAHA Istanbul ավիացիոն, պաշտպանական և տիեզերական ասոցիացայի խորհրդի նախագահ, Baykar ընկերության գլխավոր տնօրեն Հալուք Բայրաքթարը։
Նրա խոսքով՝ թուրքական պաշտպանական և օդատիեզերական արդյունաբերության արտադրանքի արտահանումը նախորդ տարի ռեկորդ է սահմանել՝ առաջին անգամ գերազանցելով 3 մլրդ դոլարը․ ոլորտը 3․22 մլն դոլարի արտադրանք է իրացրել։
«Վերջին 15 տարիների ընթացքում ոլորտի արտադրանքի արտահանման աճի տեմպերն արագացել են երկրաչափական պրոգրեսիայով։ 2006-2021 թվականներին պաշտպանական և օդատիեզերական ոլորտում թուրքական արտահանումն աճել է մոտավորապես 7 անգամ՝ դոլարային արտահայտությամբ։ Սա իսկապես մեծ հաջողություն է։ Թուրքիայի բաժինը համաշխարհային արտահանման մեջ կազմում է մոտ 1 տոկոս։ Ներկայում համաշխարհային վաճառքի 75 տոկոսն այդ ոլորտում բաժին է ընկնում ԱՄՆ-ին, Ռուսաստանին, Ֆրանսիային, Գերմանիային և Չինաստանին»,- ասել է Բայրաքթարը՝ նշելով, որ գլխավոր նպատակը համաշխարհային մասշտաբով շուկայի մասնաբաժինն ավելացնելն ու առաջատար 10 երկրների ցանկում հայտնվելն է։
Նա նաև ուշադրություն է հրավիրել Bayraktar TB2 անօդաչու թռչող սարքերի նկատմամբ պահանջարկի ավելացման վրա։ Բայրաքթարն ասել է, որ Bayraktar TB2-ը հաջողությամբ 420,000 ժամ թռիչք է կատարել, գնման պայմանագիր է կնքվել 16 երկրի հետ։
«Բացի այդ, Bayraktar Akıncı հարվածային անօդաչու թռչող սարքի արտահանման առաջին պայմանագիրն է կնքվել։ Պայմանագրի շրջանակում մատակարարումները նախատեսված են 2023 թվականին։ 15-20 տարի առաջ մենք նման էինք ոլորտի, որը զբաղվում է արդյունաբերական աութսորսինգով։ Հիմա մենք արտահանում ենք սեփական արտադրանքը բարձր ավելացված արժեքով, այդ թվում՝ զրահատեխնիկա, օդային տրանսպորտային միջոցներ, ռազմածովային հարթակներ, զինամթերք, անօդաչու թռչող սարքեր և հարձակողական անօդաչու թռչող սարքեր աշխարհի 169 երկիր, այդ թվում՝ ՆԱՏՕ-ի և ԵՄ անդամ երկրներ»,- ասել է Բայրաքթարը։
Էմմա Չոբանյան
