17.12.2025 | 13:25
FIFA The Best. Մեսիի ընտրությունը, Ռոնալդուն դարձյալ չի քվեարկել
Amensty International-ը հայտարարել է, որ Ալիևի իշխանությունը շարունակում է բռնաճնշումները
Քաղաքականություն
16.12.2021 | 19:04
Ադրբեջանի իշխանություննեը շարունակում են քաղաքական ընդդիմության նկատմամբ բռնաճնշումները՝ խախտելով խոսքի ազատության ու խաղաղ հավաքների իրավունքը՝ կոշտ դիրքորոշում որդեգրելով խաղաղ ցույցերի նկատմամբ։ Այս մասին ասվում է միջազգային իրավապաշտպան Amensty International կազմակերպության հայտարարության մեջ՝ կապված դեկտեմբերի 1-ին Բաքվում խաղաղ ցույցի ցրման հետ, որն անցկացվել էր քաղբանտարկյալ Սալեհ Ռուստամովի ազատ արձակման պահանջով։
«Ադրբեջանի ոստիկանության կողմից խաղաղ ցուցարարների ձերբակալությունները, նրանց խոշտանգումները և այլ տիպի դաժան վերաբերմունքը պետք է դադարեցվի»,-ասվում է հայտարարության մեջ։
Կազմակերպությունը նշում է, որ Ադրբեջանի իշխանությունները պետք է անհապաղ ազատ արձակեն բոլոր նրանց, որոնք ձերբակալվել են խոսքի ազատության և խաղաղ հավաքների իրենց իրավունքից օգտվելու համար, և արդյունավետորեն հետաքննել ոստիկանության անհարկի կամ չափից ավելի ուժի, խոշտանգումների և կալանավորների նկատմամբ այլ դաժան վերաբերմունքի մասին բոլոր մեղադրանքները։ Հակաիրավական գործողությունների մեղավորները պետք է պատասխանատվության ենթարկվեն։
Կազմակերպությունը մտահոգված է, որ Ադրբեջանի կառավարությունը շարունակում է արգելել ազատության իրավունքի իրացումը։
«Դա հակասում է ինչպես ազգային օրենքներին, այնպես էլ Ադրբեջանի ստանձնած միջազգային պարտավորություններին։ Բացի այդ՝ կազմակերպությունն անհանգստացած է նրանով, որ Ադրբեջանի իշխանությունները շարունակում են կամայականորեն կանոններ և սահմանափակումներ կիրառել համավարակի հետ կապված՝ արդարացնելու խաղաղ ցույցերի ճնշումը»,- ասվում է կազմակերպության հայտարարության մեջ։
Հավելենք, որ նախօրեին ևս մի խումբ ակտիվիստներ ու ընդդիմադիր գործիչներ բողոքի ակցիա են անցկացրել Բաքվում, որը կրկին ուժի կիրառմամբ ցրվել է ոստիկանների կողմից։
Էմմա Չոբանյան
