Ամասիայում ՔՊ-ականները հրաժարվեցին իշխանության մաս կազմելուց

Շիրակի մարզի Ամասիա խոշորացված համայնքում  Տեղական ինքնակառավարման մարմինների նոր ընտրություններ չեն անցկացվի,  իշխանություն կձևավորվի առանց «Քաղաքացիական պայմանագիր» կուսակցության։

ՏԻՄ ընտրություններում վեց մանդատ ստացած «Քաղաքացիական պայմանագիր» կուսակցության ավագանու անդամները ինքնաբացարկի դիմում էին ներկայացրել՝ հրաժարվելով մանդատներից։

Քիչ առաջ ավարտվել է թիվ 30 ընտրատարածքային հանձնաժողովի նիստը․ արդյունքում 9 մանդատ է բաշխվել,  6-ը՝ «Արփի Ամասիա» նորաստեղծ դաշինքին, 3-ը՝ ՀՀԿ-ին։

«ՔՊ-ականների գրանցումը համարվեց ուժը կորցրած՝ իրենց դիմումների համաձայն։ Ամասիայում  նոր ընտրություններ միանշանակ չեն լինելու»,-տեղեկացրեց ընտրատարածքային հանձնաժողովի նախագահ Արթուր Խաչատրյանը։

Հիշեցնենք, որ Ամասիայում պայքարում էին երեք քաղաքական ուժեր՝ ՔՊ-ն, որի թեկնածուն Մերգել Ղարիբյանն է՝ Արփի խոշորացված համայնքի ղեկավարը, «Արփի Ամասիա» նորաստեղծ դաշինքը, որի թեկնածուն Ամասիա խոշորացված համայնքի 71-ամյա ղեկավար Ջեմմա Հարությունյանն է և  ՀՀԿ-ն, որի թեկնածուն էլ  վերջինիս տեղակալն է՝ Արթուր Մկրտումյանը։

Մերգել Ղարիբյանը մեզ հետ զրույցում կարծիք էր հայտնել, որ համայնքապետը պիտի լինի ՔՊ-ից, քանի որ ամենաշատ ձայները հավաքել է այս քաղաքական ուժը։ Մանդատներից հրաժարվելը կապված էր համայնքապետի պաշտոնի շուրջ  տարաձայնություններով։

Արմիկ Մովսիսյան