Պատգամավորի կարգավիճակ ձեռք բերելու պահից անձը չի կարող պահվել անազատության մեջ. ՍԴ-ն որոշում կայացրեց

Սահմանադրական դատարանը քիչ առաջ հրապարակեց դեկտեմբերի 7-ին կայացրած որոշման ամբողջական տարբերակը, ըստ որի՝ անազատության մեջ գտնվող պատգամավորի կարգավիճակ չունեցող անձը պատգամավորի կարգավիճակ ձեռք բերելու պահից, բացառությամբ

Սահմանադրության 96-րդ հոդվածի 2-րդ մասով նախատեսված դեպքերի, չի կարող պահվել անազատության մեջ։ 

Սա նշանակում է, որ ԱԺ պատգամավոր ընտրված անձիք, որոնք այս պահին կալանքի տակ են գտնվում, պետք է ազատ արձակվեն։ Այս որոշմանը ֆեյսբուքյան գրառմամբ անդրադարձել է «Հայաստան» դաշինքի ցուցակով պատգամավոր ընտրված, բայց կալանքի տակ գտնվող Արմեն Չարչյանի պաշտպան Էրիկ Ալեքսանյանը։ 

«Հենց այս պահին պատրաստվում եմ ներկայացնել դատարանին միջնորդություն՝ անհապահ դատական նիստ հրավիրելու և Արմեն Չարչյանի խափանման միջոց կալանավորումը վերացնելու պահանջով»,- գրել է պաշտպանը։

Նշենք, որ Բարձր դատարանի կողմից մատնաշած Սահմանադրական օրենքի 96-րդ հոդվածի 2-րդ կետի համաձայն՝ պատգամավորի նկատմամբ քրեական հետապնդում կարող է հարուցվել միայն Ազգային ժողովի համաձայնությամբ: Պատգամավորն առանց Ազգային ժողովի համաձայնության չի կարող զրկվել ազատությունից, բացառությամբ երբ նա բռնվել է հանցանք կատարելու պահին կամ անմիջապես դրանից հետո: Այս դեպքում ազատությունից զրկելը չի կարող տևել յոթանասուներկու ժամից ավելի: Պատգամավորին ազատությունից զրկելու մասին անհապաղ տեղեկացվում է Ազգային ժողովի նախագահին:

Ռոզա Վարդանյան