Բաքուն և Երևանը պետք է լինեն սահմանազատման ցանկացած ծրագրի առաջնային խաղացողները, սխալ կլինի հույսը դնել Ռուսաստանի վրա․ Փոլ Գոբլ

Ռուսաստանն այս մեկ տարվա ընթացքում պարզապես շահարկել է հայկական վախերն ու ադրբեջանական հույսերը՝ իր խաղաղապահ ուժերը Ղարաբաղ մտցնելու և այնտեղ պահելու համար։ Factor.am-ի հետ զրույցում նման կարծիք հայտնեց ամերիկացի վերլուծաբան Փոլ Գոբլը՝ անդրադառնալով 44-օրյա պատերազմի դադարեցման մասին նոյեմբերի 9-ի եռակողմ հայտարարության կատարման ընթացքին և ստեղծված իրավիճակին։

«Ռուսաստանը, միջազգային իրավունքի համաձայն, չէր կարող խաղաղապահ լինել, բայց ոչ ոք պատրաստ էլ չէր հակառակը պնդել։ Մոսկվան «հավասարակշռված» է միայն այն առումով, որ ցանկանում է, որպեսզի մի կողմը մյուսի դեմ խաղա․ այդպես նրա շահերն առաջ կմղվեն»,- ասաց նա։

Խոսելով Հայաստանի և Ադրբեջանի միջև սահմանագծման և սահմանազատման գործընթացների ու այն մասին՝ արդյո՞ք Ռուսաստանը կցանկանա, որ որևէ այլ խաղացող նույնպես ներգրավվի այդ գործընթացներում, Փոլ Գոբլը նշեց՝ Բաքուն և Երևանը պետք է լինեն սահմանազատման ցանկացած ծրագրի առաջնային խաղացողները։

«Նրանք կարող են օգտագործել արտաքին փորձագետների նույնպես, բայց սխալ կլինի հույսը դնել մեկ երկրի՝ Ռուսաստանի վրա, որը հստակ իր օրակարգն ունի»,- ընդգծեց նա։

Եռակողմ հայտարարության տարելիցին նվիրված Ռուսաստանի ԱԳՆ տարածած հաղորդագրությունում նշվում է, որ Մոսկվան վճռական է՝ շարունակել ակտիվ աշխատանքը ԵԱՀԿ Մինսկի խմբի համանախագահների հետ։

«Համանախագահները նախատեսում են այցելել տարածաշրջան և շարունակել շփումները 3+2 ձևաչափով»,- ասվում էր հաղորդագրության մեջ։

Անդրադառնալով այս ձևաչափի վերականգնման հնարավորությանը և Ռուսաստանի արտաքին քաղաքական գերատեսչության հայտարարությանը՝ ամերիկացի վերլուծաբանը նշում է՝ Մոսկվան ասում է, որ ցանկանում է աշխատել Մինսկի խմբի հետ, որպեսզի Փարիզն ու Վաշինգտոնը չառարկեն նրա դիրքորոշումներին։

«Բայց ես կասկած չունեմ, որ Կրեմլը մտադիր է մի կողմ թողնել երկու արևմտյան երկրներին և խթանել «3+3» ձևաչափի իրականացումը, որպեսզի ինքն այնտեղ գերիշխող լինի»,- ասաց նա։

Ինչ վերաբերում է, այսպես կոչված, «Զանգեզուրի միջանցքի» մասին ՌԴ ԱԳՆ դիրքորոշմանը, այն է՝ եռակողմ աշխատանքային խմբի բոլոր մասնակիցները պայմանավորվել են, որ նորաստեղծ տրանսպորտային ուղիները կգործեն՝ ելնելով այն երկրների ինքնիշխանության և տարածքային ամբողջականության նկատմամբ հարգանքից, որոնցով նրանք անցնում են, Փոլ Գոբլը նշեց․ «Մոսկվան շատ է խոսել Զանգեզուրի և միջանցքի մասին, բայց միշտ հղում է արել ինքնիշխանությանը և տարածքային ամբողջականությանը։ Սա հուշում է, որ ինքը չի ազդի խնդրի վրա, եթե Հայաստանը դիմադրի։ Բայց այդպես կլինի, քանի դեռ Ռուսաստանը չի վերահսկել ամբողջ տարածաշրջանը»,- ասաց նա։

Հռիփսիմե Հովհաննիսյան