Տնտեսություն
27.10.2021 | 18:15Մինչ կառավարությունը բանակցում է ճանապարհներն ապաշրջափակելու ուղղությամբ, Ադրբեջանը վերահսկողություն սահմանեց Հայաստանի հարավային ճանապարհի նկատմամբ։ Այսօր արդեն երեք կողմից ենք շրջափակված։ ԱԺ-ում ասաց «Հայաստան» խմբակցության պատգամավոր Արթուր Խաչատրյանը։
Պատգամավորը նկատեց՝ խոսում են այլընտրանքային ճանապարհից, սակայն այն փաստը, որ իրանցի վարորդները գերադասում են գումար վճարել, այլ ոչ թե այլընտրանքային ճանապարհից օգտվեն, ապացուցում է, որ այն այդքան էլ արդյունավետ, իրական այլընտրանք չէ։
«Մոտավորապես ի՞նչ ճանապարհների մասին է խոսք գնում։ Արդյո՞ք Վարդենիս-Մարտակերտ ճանապարհի ապաշրջափակումը ներառվա՞ծ է այդ բանակցությունների շրջանակի մեջ»,- նշեց պատգամավորը։
ՀՀ փոխվարչապետ Մհեր Գրիգորյանը պատասխանեց, որ Վարդենիս-Մարտակերտ ճանապարհի ապաշրջափակումն օրակարգում չկա։ Նա նշեց, որ եռակողմ աշխատանքային խմբի աշխատանքները կազմակերպում են հունվարի 11-ի հայտարարության բովանդակության շրջանակներում և դրանից դուրս չեն գալիս։
«Հարավային երկաթգծի վերականգնման հարց քննարկվում է, բայց ճանապարհ չի քննարկվում։ Խոսքը վերաբերում է ապաշրջափակմանը, այսինքն՝ տարածաշրջանում բոլոր երկրներին հնարավորություն տալ փոխադարձ օգտագործել գործող ենթակառուցվածքները»,- նշեց փոխվարչապետը։
Պատգամավորի դիտարկմանը, որ Ալիևն ու Էրդողանը հայտարարել են՝ Վարանդայից Կոստանդնուպոլիս ճանապարհի կառուցման մասին, և հարցին, թե արդյոք դա ևս ներառված է բանակցությունների շրջանակում, Մհեր Գրիգորյանն պատասխանեց, որ պատգամավորը հղում է անում բանավոր հայտարարությունների վրա, իսկ ինքը հղում է անում գրավոր փաստաթղթերի վրա, որոնք ստորագրված են եռակողմ, և այդ հայտարարության շրջանակներում են մնում:
«Ինչ մնում է ճանապարհներին, այս պահին դեռևս կոնսենսուս չկա, առաջարկները շատ են»,- նշեց փոխվարչապետը՝ հավելելով, որ դեռևս ավտոճանապարհների քարտեզ չկա:
Մանրամասները տեսանյութում:
