24.02.2026 | 16:43
ՀԷՑ-ում ավարտվել են բարձրավոլտ ենթակայանների ստուգայցերը․ արձանագրվել են համակարգային խնդիրներ
Հիվանդացության թվերն աճում են․ խստացված ռեժիմով, ամենօրյա ռեյդերով կիրականացվեն տեսչական ստուգայցեր․ Նոնա Հայրապետյան․ ՏԵՍԱՆՅՈւԹ
Հասարակություն
19.08.2021 | 20:17
Տեսչական մարմինները և ոստիկանությունը խստացնում են դիմակների կրման և հակահամաճարակային այլ միջոցառումների նկատմամբ հսկողությունը։ Մանրամասների շուրջ Factor TV-ն զրուցել է ՀՀ առողջապահական և աշխատանքի տեսչական մարմնի ներկայացուցիչ Նոնա Հայրապետյանի հետ։
— Տիկին Հայրապետյան, նախ հասկանանք՝ ինչ է փոխվում հիմա։ Ի՞նչ էր մինչ այս և ի՞նչ է լինելու։
— Առողջապահական և աշխատանքի տեսչական մարմինը մշտապես իրականացրել է վերահսկողական գործառույթը՝ ստուգայցերի ձևաչափով, թեկուզ այն ժամանակ, որ կորոնավիրուսով հիվանդացության դեպքերի թիվը նվազել էր։ Այդուհանդերձ մենք իրականացնում էինք ստուգայցեր։
Հիմա, երբ հիվանդացության թվերն աճում են, դրա հետ զուգընթաց, խստացված ռեժիմով, ռեյդերի միջոցով, ամենօրյա կտրվածքով պետք է իրականացվեն ստուգայցեր։
— Բնակչության մի մասը պատվաստվել է։ Եվ մարդկանց մոտ կա կարծիք, որ եթե իրենք ունենան պատվաստման վկայական, իրենք կարող են ազատ լինել, դիմակ չկրել։
— Պատվաստվելու պարագայում ևս քաղաքացին պետք է կրի դիմակ փակ տարածքում, որովհետև նշեցինք, որ դելտա շտամը շատ վարակելի է, հետևաբար, պատվաստված լինելը չի նշանակում, որ դու դեռևս հիվանդ չես կամ կրող չես։ Այսինքն դու կարող ես կրել տվյալ շտամը և կողքինի համար լինես վտանգավոր։
Փակ տարածք պետք է մուտք գործել միմիայն դիմակով։ Պատվաստված լինելը դեռ չի նշանակում, որ փակ տարածքում պետք է դիմակ չկրել։
— Տեսչական մարմինների այցերից ի՞նչ տպավորություն ունեք․ մարդիկ հակվա՞ծ են վերադառնալ խիստ ռեժիմի, թե՝ ոչ։
— Ինչ խոսք, ազգաբնակչության զգոնությունը բարձր չէ։ Ես ևս մեկ անգամ խնդրում եմ, հորդորում եմ, որ պետք է լինել շատ զգոն, պետք է պահպանել բոլոր պահանջները, որոնք միտված են կորոնավիրուսային հիվանդացության կանխարգելմանը։
Հարցազրույցն ամբողջությամբ՝ տեսանյութում։
Գարիկ Հարությունյան
