Փուլայի՞ն, թե՞ փաթեթային տարբերակ․ քաղաքացիների և նախարարության միջև «դեղերի պատերազմում» հրադադար կնքվեց. ՏԵՍԱՆՅՈՒԹ

Դեղերի բացթողնման կարգի փոփոխությունը, որը կառավարությունը ձեռնարկել էր մարտի 1-ից, խաթարեց հայաստանցիների առօրյան, խառնաշփոթ առաջացրեց դեղատներում, բուժհաստատություններում, կառավարությունում: Մեծ իրարանցման առաջին արարը դեղատնային խուճապն էր: Փետրվարի վերջին օրերին տանում էին ամեն ինչ՝ նիմեսիլից մինչև ամենաթանկարժեք հորմոնային միջոցները: Հասարակ դեղամիջոցները՝ սոլպադեին, պենտալգին, տիրոկսին, Հայաստանում տարածված վահանաձև գեղձի խպիպի մյուս դեղամիջոցները այլևս դեղատոմսով էին վաճառվում։ Իսկ մարտի 1-ից, երբ ուժի մեջ մտավ դեղերի դուրս գրման նոր կարգը, դեղերի վաճառքը կտրուկ կանգնեց, դեղատները դատարկվեցին: Փոխարենը, պոլիկլինիկաներում հերթեր գոյացան:

Բացի այդ, նոր կարգը ներմուծվեց իրավական սխալով։ 2016 թվականին ընդունված դեղերի մասին օրենքով Հայաստանում գրանցված մոտ 4700 անուն դեղից դեղատոմսով բացթողնման ենթակա է 2700-ը: Նոյեմբերին կառավարությունը դեղատոմսով դուրս գրման ենթակա դեղամիջոցների ամբողջական ցանկն էր ընդունել, բայց մարտի 1-ից նախարարությունը որոշեց փուլային տարբերակ կիրառել՝ այս պահանջը տարածել հակաբիոտիկների, հորմոնային պրեպարատների և կոդեին պարունակող դեղերի վրա: Հուլիսի 1-ից այն պետք է տարածվեր ներարկումային և հակաուռուցքային դեղերի, իսկ հոկտեմբերի 1-ից՝ դեղատոմսով դուրս գրվող մնացած բոլոր դեղերի նկատմամբ:

«Փուլային» տարբերակը հրապարակվել էր, ցանկը բաժանվել էր դեղատներին և բուժհաստատություններին։ Վերջիններս աշխատում էին այս ցանկով, սակայն իրավական ակտ, որով սահմանվում է նոր կարգը, կառավարությունը դեռ չէր ընդունել: Ստացվում է, Առողջապահության նախարարությունը զբաղված էր ապօրինի գործունեությամբ: «Իրավական հակասություն կա։ Դու նոյեմբերից գրում ես, որ մարտի 1-ից ամբողջ ցանկը ուժի մեջ է մտնում, բայց հիմա նոր, այս շաբաթ պետք է կառավարության որոշում ընդունեն, փոփոխություն անեն ցանկում։ Դիլետանտիզմ է։ Գաղափարը՝ լավ, ճիշտ, բայց հետո, որ արդեն պիտի նախապատրաստեն փուլ առ փուլ, տեսնում են, որ հակասող բաներ կան», – ասում է «Սուրբ Աստվածամայր» բժշկական կենտրոնի տնօրեն Նիկոլայ Դալլաքյանը։

Այժմ նոր կարգը կասեցված է։ Կառավարության նոր որոշման ընդունումը սպասվում է գործադիրի առաջիկա նիստին։

Սյուզան Սիմոնյան