21.06.2026 | 17:14
Իրանը ներկայացրել է իր ակնկալիքները ԱՄՆ-ի հետ Շվեյացարիայում կայանալիք բանակցություններից
Ադրբեջանում ԱՄՆ դեսպանը հանդիպել է քաղհասարակության ձերբակալված ներկայացուցիչների ընտանիքներին և նրանց ազատ արձակելու կոչ արել
Քաղաքականություն
08.05.2024 | 14:55
Ադրբեջանում ԱՄՆ դեսպան Մարկ Լիբբին հանդիպել է երկրի իշխանությունների կողմից ձերբակալված քաղահասարակության ներկայացուցիչների ընտանիքների անդամների հետ։ Այս մասին հայտնում է ԱՄՆ դեսպանատունը X-ում գրառմամբ։
«Դեսպան Լիբբին հանդիպել է քաղաքացիական հասարակության ձերբակալված անդամների ընտանիքների հետ՝ քննարկելու նրանց հետ կապված իրավիճակը։ Միացյալ Նահանգները խորապես համոզված է, որ անկախ քաղաքացիական հասարակությունը գործող և պատասխանատու հասարակության անբաժանելի մասն է, և որ անարդարացիորեն ձերբակալվածները պետք է ազատ արձակվեն, որպեսզի կարողանան շարունակել իրենց կարևոր աշխատանքը»,- ասվում է գրառման մեջ։
Բանտում գտնվող ընդդիմադիր գործիչ Թոֆիգ Յագուբլուի դուստր Նիգար Հազին լրատվամիջոցներին ասել է, որ լրագրող Սևինջ Վաքըֆքըզիի մոր՝ Օֆելյա Մահերրամովայի և «III հանրապետություն» հարթակի խորհրդի անդամ Ռուսլան Իզեթլիի կնոջ՝ Գյունել Մանաֆլիի հետ մասնակցել են հանդիպմանը։
Վերջին ամիսների ընթացքում Ադրբեջանում մաքսանենգության մեղադրանքով ձերբակալվել են տարբեր լրատվամիջոցներ ներկայացնող շուրջ երկու տասնյակ լրագրողներ, ընդդիմադիր գործիչներ ու քաղաքական ակտիվիստներ։ Խուզարկություններ են իրականացվել Abzas Media-ի, Toplum TV-ի գրասենյակներում և որոշ լրագրողների բնակարաններում։ Միջազգային կառույցները կոչ են անում Ադրբեջանի իշխանություններին դադարեցնել բռնաճնշումներն ու բոլորին ազատ արձակել։ Ապրիլի 25-ին էլ Եվրախոհրդարանը բանաձև էր ընդունել՝ կոչ անելով Ադրբեջանի իշխանություններին ազատ արձակել բոլոր քաղբանտարկյալներին։
Վերջին ձերբակալվածներից է Ընտրությունների մոնիթորինգի և ժողովրդավարության ուսուցման կենտրոնի ղեկավար, հայտնի իրավապաշտպան Անար Մամեդլին։ Այդ կապակցությամբ իրենց մտահոգություն են հայտնել ԱՄՆ Պետքարտուղարությունն ու ԵՄ-ն։
Էմմա Չոբանյան
