25.08.2026 | 20:13
Ռոբերտ Քոչարյանի կալանքի հարցը կքննեն բժշկական հետազոտություններից հետո
Ադրբեջանցիները չեն ներկայացել բանակցություններին․ ԱՄՆ-ն կոչը՝ չայցելել Հայաստան և Ադրբեջան․ Լուրեր
Քաղաքականություն
19.05.2021 | 15:08
Պաշտպանության նախարարությունը հայտնում է, որ չնայած վաղօրոք ձեռք բերված պայմանավորվածությանը՝ ադրբեջանական կողմը բանակցություններին չի ներկայացել։ Այսօր, մայիսի 19-ին, ժամը 14։00-ին պետք է շարունակվեին ադրբեջանական ԶՈՒ կողմից հայ-ադրբեջանական սահմանին իրականացված սադրանքի հետևանքով ստեղծված իրադրության խաղաղ հանգուցալուծման շուրջ բանակցությունները։
—
ԱՄՆ պետքարտուղարությունը իր քաղաքացիներին խորհուրդ է տալիս չայցելել Հայաստան և Ադրբեջան։ Ամերիկյան կողմը կոչ է անում չճանապարհորդել սահմանային շրջաններ, ինչպես նաև Լեռնային Ղարաբաղ ու հարակից շրջաններ։ Այս ամենից բացի, ԱՄՆ-ն լրացուցիչ ռիսկ է տեսնում Ադրբեջանի տարածքում՝ ահաբեկչական գործողությունների ձևով։
—
Արցախի Մարտունու շրջանի Կարմիր Շուկա համայնքի բնակիչները մայիսի 18-ին, ադրբեջանցիների ոչ պատշաճ պահվածքի համար դիմել են գյուղի տարածքում տեղակայված ռուս խաղաղապահներին: Համայնքի ղեկավար Նարեկ Աթայանի խոսքով՝ շաբաթական երեք անգամ թշնամու ավտոշարասյունն անցնում է գյուղի տարածքով՝ այդ ընթացքում դրսևորելով լկտի պահվածք։
—
Անվտանգության խորհրդի քարտուղար Արմեն Գրիգորյանը հայտնել է, որ սահմանազատման ու սահմանագծման աշխատանքներ սկսելու Ռուսաստանի առաջարկությանն ի պատասխան Հայաստանն ընդգծել է նման աշխատանքներ նախաձեռնելուց առաջ ՀՀ ինքնիշխան տարածքից ադրբեջանական զինված ուժերի ներկայացուցիչների դուրսբերման անհրաժեշտությունը, որից հետո միայն պայմաններ կստեղծվեն նման քննարկումների համար:
—
