Բաքվում ՄԹ դեսպանը խոսել է Արցախի կարգավիճակի և ԼՂ-ում միջազգային խաղաղապահների տեղակայման մասին

Ադրբեջանում Մեծ Բրիտանիայի դեսպան Ջեյմս Շարփը BBC-ի ադրբեջանական ծառայության հետ հարցազրույցում մի շարք ուշագրավ հայտարարություններ է արել։

Մասնավորապես, նա նշել է, որ Լոնդոնը Լեռնային Ղարաբաղում կցանկանար տեսնել բազմազգ խաղաղապահ ուժեր, և ոչ թե բացառապես ռուսական զորախումբ, ինչպես նաև խոսել է տարածաշրջանում Միացյալ Թագավորության դերակատարման մասին հետպատերազմյան գործընթացներում։

Դեսպանը նաև ասել է, որ ականապատ դաշտերի քարտեզների ու ռազմագերիների փոխանակման անհրաժեշտություն կա և մշակութային ժառանգության համատեղ հոգածության կարիք, որը յուրաքանչյուր կողմ ձգտում է օգտագործել քաղաքական նպատակներով՝ տարածաշրջանում իր առավելությունն ապացուցելու համար։

Բրիտանիան նախընտրում է, որ բանակցությունները վարի ԵԱՀԿ Մինսկի խումբը, իսկ խաղաղապահ ուժերը լինեն միջազգային, ասել է դեսպանը։

«Պետք է ուսումնասիրել մանդատը (ՌԴ խաղաղապահ ուժերի), վերջնական տեսքի բերել այդ մանդատը՝ ինչը կարող է լինել դրան այլընտրանք, ինչը կարող է հաջորդել»,- ասել է Շարփը։

Նա նաև դրական է գնահատել Բաքվի, Երևանի ու Մոսկվայի միջև եռակողմ բանակցությունների օրակարգը տարածաշրջանում տրանսպորտային հաղորդակցությունների բացման ու տնտեսական համագործակցության համար։

Բրիտանացի դիվանագետը նաև խոստովանել է, որ Լեռնային Ղարաբաղի կարգավիճակի հարցը մնում է չլուծված։

«Ի վերջո, վերջնական կարգավորման, խաղաղության պայմանագրի հարցը պիտի լուծվի, և ԵԱՀԿ Միսկի խմբի համանախագահները դրանում պիտի դերակատարում ունենան»,- ասել է դեսպանը։

Նշենք, որ Ադրբեջանում Մեծ Բրիտանիայի դեսպանն այցելություններ է կատարել նաև Արցախի գրավյալ տարածքներ ու այդ մասին հրապարակումներ արել սոցցանցերում։

Էմմա Չոբանյան