12.01.2025 | 22:00
Ընտրությունները կեղծվեցին, բայց մենք էլ չպատրաստվեցինք այնպես, ինչպես անհրաժեշտ էր․ Զուրաբիշվիլի
Վրաստանի արևմտյան հետագիծը վտանգի տակ է․ ԱՄՆ Պետքարտուղարություն
Քաղաքականություն
02.05.2024 | 13:44
ԱՄՆ-ը դատապարտում է Կրեմլի կողմից ներշնչված «օտարերկրյա ազդեցության թափանցիկության» մասին օրինագիծը, որը երկրորդ ընթերցմամբ ընդունվել է Վրաստանի խորհրդարանում, և կառավարության պաշտոնյաների կեղծ նարատիվները՝ այն պաշտպանելու համար: Այս մասին ասվում է ԱՄՆ Պետքարտուղարության խոսնակ Մեթյու Միլլերի տարածած հայտարարության մեջ։
«Իշխող կուսակցության անդամները պարզ հասկացրել են, որ օրենքի նպատակն է լռեցնել քննադատական ձայները և ոչնչացնել Վրաստանի կենսունակ քաղաքացիական հասարակությունը: Այս օրենքը և «Վրացական երազանքի» հակաարևմտյան հռետորաբանությունը Վրաստանը դնում են անորոշ հետագծի վրա: Վրաստանի կառավարության հայտարարություններն ու գործողություններն անհամատեղելի են ժողովրդավարական արժեքների հետ, որոնք հիմքն են ԵՄ-ին և ՆԱՏՕ-ին անդամակցությանը, և այդպիսով վտանգում են Վրաստանի ուղին դեպի եվրաատլանտյան ինտեգրում»,- նշում է Պետքարտուղարությունը։
Ըստ հայտարարության՝ մեկնաբանությունները, որոնք սխալ են բնութագրում արտաքին օգնությունը, որը տրամադրել են Վրաստանին 32 տարի՝ երկրի տնտեսությունն ամրապնդելու, ժողովրդավարությունը և ռուսական ագրեսիան զսպելու կարողության համար, հիմնովին խաթարում են Վրաստանի կառավարության և ժողովրդի հետ հաստատված ամուր հարաբերությունները:
«Մենք կանգնած ենք վրաց ժողովրդի և նրա ձայնը լսելի լինելու իրավունքի կողքին: Մենք դատապարտում ենք խաղաղ ցույցերի, այդ թվում՝ ցույցերը լուսաբանող լրագրողների նկատմամբ բռնության կիրառումը։ Խաղաղ հավաքները և խոսքի ազատությունը ճնշելու համար ուժի կիրառումն անընդունելի է, և մենք կոչ ենք անում իշխանություններին՝ թույլ տալ ցուցարարներին շարունակել օգտվել իրենց խոսքի ազատության իրավունքից»,- նշվում է հայտարարության մեջ։
