Յաշմա ջոկատի դեմ կռված Խաչատուրի հիշատակի խաչքարը` նկուղում. քաղաքապետարանը թույլ չի տալիս այն դնել․ ՏԵՍԱՆՅՈՒԹ

Պատերազմի զոհերի հիշատակը հավերժացնող խաչքարը երկու տարուց ավելի է՝ նկուղում է, պոլիէթիլենային տոպրոկով փաթաթված։ 44-օրյա պատերազմի ընթացքում միակ որդուն՝ Խաչատուրին, կորցրած Առնակ Միքայելյանն արդեն տևական ժամանակ Երևանի քաղաքապետարանից և Աջափնյակ վարչական շրջանի ղեկավարի աշխատակազմից փորձում ստանալ հարցի պատասխանը՝ ինչո՞ւ չի կարող Գեւորգ Չաուշի փողոցի 14/3 շենքի շենքի բակում խաչքար տեղադրել։

Հոր փոխանցմամբ՝ 44-օրյա պատերազմի ժամանակ Խաչատուրը եղել է Ֆիզուլիում, ծառայակիցների հետ պայքարել է «Յաշմա» ջոկատի դեմ, սխրանքի համար ԱՀ նախագահի հրամանագրով հետմահու պարգևատրվել է «Արիության համար» մեդալով: 

«Ասե՛ք, կանենք» կարգախոսով նախընտրական քարոզարշավ իրականացնող Տիգրան Ավինյանը ամիսներ առաջ եղել էր նաև այս շենքի բակում։ Ըստ Առնակ Միքայելյանի՝ քաղաքապետի թեկնածուն այդ ժամանակ խաչքարը տեղադրելուն հավանություն է տվել։

Խաչատուրի հոր փոխանցմամբ՝ Ավինյանն անգամ տարակուսել է, երբ խաչքարը տեսել է այս պայմաններում և բանավոր կարգադրություններ է տվել։ 

Երևանի քաղաքապետարանից Factor TV-ին փոխանցված պատասխանից պարզ է դառնում, որ չեն պատրաստվում թույլ տալ զոհվածի հիշատակին շենքի բակում խաչքար տեղադրել։ Կառույցից նաև հայտնեցին, որ տարածքը համայնքապատկան է և քանի որ այն հարակից բազմաբնակարան շենքերի բակային տարածք է և չի կարող օտարվել որևէ մեկին:  

Քաղաքապետարանից միաժամանակ փոխանցում են, որ խաչքարեր տեղադրելու հարցով բազմաթիվ գրություններ են ստացել, բոլորին հնարավոր չէ դրական ընթացք տալ։ Տիգրան Ավինյանին ուղղված գրավոր հարցման պատասխանում նշվում է․ «Աջափնյակ վարչական շրջանի 1-ին շղթայում արդեն տեղադրված է «Հերոսների հուշաքար»:

Մանրամասները` տեսանյութում։