ԱՄՆ-ը ՌԴ-ին մեղադրել է Ուկրաինայի նկատմամբ քիմիական զենք կիրառելու մեջ

Ռուսաստանը խախտել է քիմիական զենքի կիրառման միջազգային արգելքը։ Այս մասին ասվում է ԱՄՆ Պետքարտուղարության՝ Ռուսաստանի դեմ նոր պատժամիջոցների սահմանման մասին հայտարարությունում, գրում է DW-ի ռուսական ծառայությունը։

Պետքարտուղարությունը պնդում է, որ ռուսական զորքերն Ուկրաինայի զինված ուժերի նկատմամբ կիրառել են քլորոպիկրին թունավոր նյութը։ Այս ամենի հետ կապված ԱՄՆ-ի նոր պատժամիջոցների ցանկում ներառվել են ՌԴ ՊՆ Ճառագայթային, քիմիական և կենսաբանական պաշտպանության զորքերը, կիրառական ակուստիկայի ռուսական գիտահետազոտական ​​ինստիտուտը և ՌԴ ՊՆ 48-րդ կենտրոնական գիտահետազոտական ​​ինստիտուտը, ինչպես նաև չորս ընկերություններ, որոնք կապված են ռուսական քիմիական ու կենսաբանական զենքի ծրագրերի հետ։

«Նման քիմիական նյութերի օգտագործումը միակ դեպքը չէ և, հավանաբար, պայմանավորված է ռուսական ուժերի ցանկությամբ՝ դուրս մղել ուկրաինական զորքերն ամրացված դիրքերից և հասնել մարտավարական հաջողությունների մարտի դաշտում»,- ասվում է հայտարարության մեջ։

Պետքարտուղարության տվյալների համաձայն՝ Ռուսաստանում զանգվածային բողոքի ցույցերը ճնշելու նպատակով օգտագործվել է նաև քլորոպիկրին արցունքաբեր նյութ։ Քլորոպիկրինը, որն արգելված է Քիմիական զենքի արգելման Հաագայի կազմակերպության կողմից, հեղուկ է, որի գոլորշիներն ազդում են մաշկի և լորձաթաղանթների վրա, իսկ  բարձր կոնցենտրացիաներում առաջացնում են մկանների անկառավարելի ցնցումներ: Այն առաջին անգամ օգտագործվել է գերմանական զորքերի կողմից Առաջին համաշխարհային պատերազմի ժամանակ։

Reuters-ը, վկայակոչելով ուկրաինացի զինվորականներին, հայտնել էր, որ ռուսական զորքերը մարտի դաշտում օգտագործել են նաև նռնակներ CS արցունքաբեր գազով, որը նաև հայտնի է որպես «Յասաման»։