26.03.2026 | 10:10
ՀՀ-ն ԱՊՀ երկրների հետ կպայքարի մարդու իրավունքների համար․ նոր պայմանագիր է վավերացվում
Կոնկրետ հայ գերիների հարցն առանձին է քվեարկվել, ՌԴ-ի քվեարկությունն անակնկալ էր. Էդմոն Մարուքյան․ ՏԵՍԱՆՅՈՒԹ
Քաղաքականություն
20.04.2021 | 15:30
Մինչ այս պահը մեզ երբևէ չի հաջողվել կազմակերպել այս մակարդակի քննարկում. միայն այն հանգամանքը, որ հայ գերիների հարցը հրատապ է համարվել և առանձին է քվեարկվել, դա, կարծում եմ, մեծ ձեռքբերում է: Factor.am-ի հետ տեսակապով զրույցում այս մասին նշեց ԵԽԽՎ-ում հայաստանյան ներկայացուցիչ, «Լուսավոր Հայաստան» խմբակցության ղեկավար Էդմոն Մարուքյանը:
Մարուքյանի խոսքով՝ քննարկումը կարելի է արդյունավետ համարել, եթե դրա արդյունքում միջազգային ճնշումն ուժեղանա Ադրբեջանի նկատմամբ, և Ադրբեջանը վերադարձնի Հայաստանի քաղաքացիներին:
Անդրադառնալով դիտարկմանը, որ հայ ռազմագերների հարցը ԵԽԽՎ նիստի օրակարգում ներառելու հարցի վերաբերյալ քվեարկության ժամանակ ՌԴ պատվիրակության անդամները «դեմ» և «ձեռնպահ» են քվեարկել, ինչը քննադատության առարկա է դարձել, Մարուքյանը նշեց, որ ՌԴ պատվիրակության քվեարկությունը անակնկալ էր նաև հայաստանյան պատվիրակության համար: «Ռուսական կողմի պաշտոնական դիրքորոշումը և քվեարկությունը իրար հետ չհամընկան: Հույս ունեմ իրենք կպարզաբանեն, թե ինչու են այդպես քվեարկել: Այսօրվա նիստը շանս է, որ այդ հարցը պարզաբանվի ՌԴ պատվիրակների կողմից»:
Հիշեցնենք, որ հայ գերիների ու տեղահանված անձանց հարցը ԵԽԽՎ լիագումար նիստի օրակարգում ներառելուն, ռուս պատվիրակներից մի քանիսից բացի, թուրքերն ու ադրբեջանցիներն են դեմ քվեարկել, ինչպես նաև Սերբիայի ներկայացուցիչներից մի քանիսը:
Օրակարգում հարցի ներառմանը կողմ է արտահայտվել 93 պատգամավոր, դեմ` 21, ձեռնպահ` 18: Դեմ քվեարկածներից 5-ը ռուսական պատվիրակության անդամներն են եղել, իսկ ևս 7-ը ձեռնպահ են մնացել։
Մանրամասները՝ տեսանյութում:
