24.02.2026 | 19:29
Ձյան առատ տեղումների հետևանքով Երևանում ծառեր են տապալվել
Անցումը հեռավար կրթության պահի թելադրա՞նք, թե՞ ավելորդ սահմանափակում. ինչ է սպասվում․ ՏԵՍԱՆՅՈՒԹ
Հասարակություն
20.03.2021 | 17:30
Այս օրերին, երբ Առողջապահության նախարարությունից ահազանգում են Հայաստանում կորոնավիրուսի երրորդ ալիքի մասին և փաստում, որ թեստերի 30-35 տոկոսի արդյունքը դրական է, ակտիվորեն քննարկվում է հարցը՝ արդյո՞ք անհրաժեշտ է, որպեսզի այս փուլում ուսումնական հաստատությունները կրկին անցնեն ամբողջությամբ հեռավար ուսուցման։ Կրթության փորձագետ Աննա Գևորգյանի համոզմամբ՝ այն պարագայում, երբ առկա չէ որակի անկում, կարելի է կազմակերպել առցանց կրթություն, իսկ երբ դոմինանտ են գործնական շփումն ու աշխատանքը, նախապատվությունը պետք է տալ առկա ուսուցմանը։
Աննա Գևորգյանը ներկայացնում է տվյալներ Մանկական զարգացման հիմնադրամի իրականացրած հետազոտությունից։ Նա փաստում է՝ կորոնավիրուսի պայմաններում ուսուցիչները մի շարք խնդիրների առջև են կանգնել՝ ծախսելով սովորականից մի քանի անգամ ավելի էներգիա և ժամանակ։
Ծնողներից շատերը վստահ են, որ չարժե անցնել ամբողջությամբ հեռավար կրթության։
Կրթության փորձագետը վստահ է՝ հարկավոր է ուսուցման մեթոդն ընտրելիս ճկուն քաղաքականություն վարել և շարժվել ըստ իրավիճակի։
Կրթության, գիտության, մշակույթի և սպորտի նախարարի տեղակալ Ժաննա Անդրեասյանը Factor TV-ին տեղեկացրեց, որ ամբողջությամբ հեռավար ուսուցման անցնելու ծրագրեր չկան։ Ինչպես հայտնի է՝ եթե դպրոցում կորոնավիրուսի դեպքերը 10 տոկոս և ավելի են, հաստատությունն անցնում է հեռավար ուսուցման։
Փոխնախարարը հիշեցնում է՝ տարեսկզբին ուսումնական պլանի փոփոխություն է եղել, որը հնարավորություն է ընձեռել վեցօրյա ուսումնական շաբաթը փոխարինել հնգօրյայով։ Փետրվարից էլ սովորողների միջև սահմանված մեկուկես մետր հեռավորությունը փոխարինվեց մեկ մետրով։ Այս պայմանի պահպանման դեպքում դասարանում սովորողների թիվը կարող է լինել 20 հոգուց ավելի։ Հիմա խմբերի բաժանված դասարանները գերակշռում են քաղաքային մեծ դպրոցներում։
Հաշվի առնելով կորոնավիրուսով վարակվողների թվի աճը՝ փոխնախարարը հիշեցնում է, որ երկուշաբթի օրվանից առաջին և երկրորդ դասարանցիների համար մեկնարկում է գարնանային արձակուրդը, ինչը թույլ կտա նվազեցնել դպրոց հաճախողների, հետևաբար նաև՝ վարակակիրների թիվը։ Ինչ վերաբերում է բուհերին, դրանց տրված է հնարավորություն՝ ինքնուրույն կայացնել առկա կամ առցանց ուսուցման անցնելու որոշում։
Մանրամասները՝ տեսանյութում։
Աննա Բաբաջանյան
