Պլանավորում եմ առաջիկա օրերին հանդիպել խորհրդարանական ընդդիմության ղեկավարների հետ․ Փաշինյան. ՏԵՍԱՆՅՈՒԹ

ՀՀ վարչապետ Նիկոլ Փաշինյանը ծրագրում է արտահերթ ընտրությունների հարցի վերաբերյալ առաջիկա օրերին հանդիպումներ ունենալ խորհրդարանական ընդդիմության՝ «Լուսավոր Հայաստան» խմբակցության ղեկավար Էդմոն Մարուքյանի և «Բարգավաճ Հայաստան» խմբակցության ղեկավար Գագիկ Ծառուկյանի հետ:  Այս մասին Փաշինյանն ասաց Ազգային ժողովում կառավարության հետ հարցուպատասխանի ընթացքում՝ պատասխանելով անկախ պատգամավոր Արման Բաբաջանյանի հարցին:

«Ես արտահերթ ընտրությունների անցկացման առաջարկություն եմ արել, և եթե մեր խորհրդարանական ընդդիմության գործընկերներն ընդունեն առաջարկը, կունենանք ընտրություններ համապատասխան ժամկետներում»,- ԱԺ ամբիոնից ասաց ՀՀ վարչապետը:

«Հարց է առաջանում. ինչո՞ւ պետք է ընտրություններն անցկացվեն համաձայնությամբ: Մենք չենք ուզում անել քայլեր, որոնք կդիտարկվեն «ի հեճուկս»-ի տրամաբանության մեջ: Մենք ընտրությունները դիտում ենք որպես հանրային համերաշխությունը վերականգնելու միջոց՝ ժողովրդին արտահայտվելու հնարավորություն տալու համար, որպեսզի ոչ միայն արտահայտվելու հնարավորություն ունենան հանրահավաքներին մասնակցող մարդիկ, այլև բոլորը՝ ընտրատեղամաս գնալով և իրենց կամքը արտահայտելով: Կառավարությունը և քաղաքական ուժերը պետք է լինեն երաշխավոր, որ ընտրություններն անցկացվեն ազատ և արդար»,- ընդգծեց Կառավարության ղեկավարը:

«Ես արդեն հրավեր հղել եմ առաջին հերթին խորհրդարանական ընդդիմության ղեկավարներին և ես պլանավորում եմ առաջիկա օրերին հանդիպել և հույս ունեմ, որ այդ համաձայնությունը ձեռք կբերվի»,- ասաց Փաշինյանը:

Անդրադառնալով սահմանադրական հնարավոր փոփոխություններին՝ վարչապետը նշեց, որ դրանք նույնպես պետք է համաձայնեցված անցկացվեն: «Ես այդ հարցը առաջ բերելով՝ կոնկրետ բովանդակություն նկատի չեմ ունեցել… Ես նկատի եմ ունեցել այն, որ քանի որ Սահմանադրության գործունակության հետ կապված էլ հարցեր կան, ևս մեկ անգամ անդրադառնանք այդ հարցին… Հանրային քննարկման արդյունքում պարզ կլինի՝ մեծամասնության համար ընդունելի կլինի՞, որ կիսանախագահական կառավարման համակարգն ավելի էֆեկտիվ է, այսինքն՝ քննարկումների դաշտը պետք է միշտ բաց պահել»,- եզրափակեց Փաշինյանը:

Մանրամասները՝ տեսանյութում: