Մի քանի տարի առաջ հնարավորություն ունեինք հասնել ԼՂ հակամարտության շուրջ համաձայնության․ Լավրով. ՏԵՍԱՆՅՈՒԹ

Մի քանի տարի առաջ հնարավորություն ունեինք ՌԴ առաջարկների հիման վրա հասնել ԼՂ հակամարտության շուրջ համաձայնության։ Այս մասին ԻԻՀ արտգործնախարար Մոհամմադ Ջավադ Զարիֆի հետ հանդիպման արդյունքներով կայացած ճեպազրույցի ժամանակ հայտարարել է ՌԴ արտգործնախարար Սերգեյ Լավրովը։

«Մենք Լեռնային Ղարաբաղի հակամարտությանը համակ ուշադրությամբ հետևել ենք երկար տարիներ, եթե ոչ տասնամյակներ։ Եվ ԵԱՀԿ Մինսկի խմբի համանախագահության շրջանակներում, որտեղ մեզ հետ համանախագահում են ԱՄՆ-ն ու Ֆրանսիան, մենք ամենահետևողականն ենք եղել, տարատեսական գաղափարներ առաջ քաշելով,  որոնք թույլ կտային հասնել հակամարտության կարգավորմանը։ Մի քանի տարի առաջ մենք հնարավորություն ունեինք ՌԴ առաջարկների հիման վրա, որոնց աջակցել էին ԵԱՀԿ Մինսկի խմբի մյուս համանախագահները, հասնելու հակամարտության շուրջ համաձայնության, ինչը թույլ կտար պահպանել մի քանի տասնյակ հազար մարդկանց կյանք ինչպես Ադրբեջանի, այնպես էլ Հայաստանի կողմից։ Սակայն, ցավոք, այն ժամանակ դա տեղի չունեցավ»,- հայտարարել է Լավրովը՝ նշելով, որ այժմ հակամարտությունը ունեցել է գրեթե նույն հանգուցալուծումը, սակայն հազարավոր զոհերի գնով։

Լավրովը նաև նշել է, որ ՌԴ-ն չի պատրաստվում անուշադրության մատնել ԼՂ հակամարտությունը, ինչի մասին է վկայում վերջերս կայացած Ադրբեջանի, Հայաստանի ու ՌԴ ղեկավարների հանդիպումը։

Անդրադառնալով տարածաշրջանում խաղաղության հասնելուն ուղղված նոր մարտահրավերներին՝ Լավրովը նշել է, որ  Հայաստանից, Ադրբեջանից ու Ռուսաստանից բացի, տարածաշրջանում «խաղաղություն են ցանկանում նաև Իրանը, Թուրքիան ու Վրաստանը, որը Հարավային Կովկասի մի մասն է, և արդեն նախաձեռնություններ են հնչում նոր հարաբերություններ կառուցելու վերաբերյալ՝ հաշվի առնելով նոր իրականությունը։ Իրականություն, երբ չկա պատերազմ, իսկ արգելափակումներն ու նորմալ կյանքի համար մյուս խանգարող հանգամանքները վերացվել են՝ երկիր մոլորակի վրա այս կարևոր տարածաշրջանում»։

Տաթև Ֆռանգյան