17.09.2026 | 18:45
Հայկ Կոնջորյանի եղբոր վարքը քննարկվել է ՔՊ վերահսկող հանձնաժողովում
Առաջնայինը շիրակցի 62 գերիների հարցն է․ Շիրակի նորանշանակ մարզպետը խոսել է իր աշխատանքի առաջնահերթություններից
Քաղաքականություն
21.01.2021 | 20:50
Շիրակի նորանշանակ մարզպետ Հովհաննես Հարությունյանը լրատվամիջոցների ներկայացուցիչների հետ այսօր առաջին ճեպազրույցն է անցկացրել՝ ներկայացնելով իր աշխատանքի առաջնահերթությունները։
«Ինձ համար մեծ պատիվ է ծառայել Հայաստանի Հանրապետությանը, հատկապես, այս դժվարին ժամանակներում։ Ես այժմ իմ սիրելի քաղաքում եմ, իմ մարզում և պատրաստ եմ լծվել աշխատանքի Շիրակի մարզի զարգացման համար»,- ասել է Հովհաննես Հարությունյանը։
Նորանշանանակ մարզպետը խոսքը սկսել է պատերազմում զոհվածների ընտանիքներին ու հարազատներին ցավակցելով ու նշել, որ ներկայում ամենահրատապը շիրակցի 62 գերիների հարցն է, որ այս պահին Կառավարության օրակարգային կարևոր խնդիրներից է։
«Ամենօրյա, ամենժամյա ռեժիմով զբաղվում են բոլորը, ովքեր կարող են այս հարցում ունենալ լուծման հնարավորություն։ Այս պահին մանրամասների մեջ չեմ խորանա, բայց մոտեցումը մեկն է՝ գերիները պետք է վերադառնան, հնարավորության դեպքում՝ ժամ առաջ, բայց բոլորս էլ պատկերացնում ենք, որ այդ հարցը կարճ ժամանակում չի լուծվելու»,- ասել է Հովհաննես Հարությունյանը։
Նա վստահեցրել է, որ պատրաստ է աշխատել և համագործակցել մարզի խնդիրներով մտահոգ բոլոր պատասխանատուների ու կառույցների հետ։
«Ես գիտակցում և պատկերացնում եմ գործի ծանրությունը, սակայն ունեմ նաև հաստատակամություն, որ համատեղ աշխատանքով կհաջողենք։ Առողջապահության մեջ ընդունված է ասել, որ ամենակարևորը ճիշտ ախտորոշումն է, կարծում եմ՝ մեզ պետք է հիմնահարցերը ճիշտ գնահատել և հնարավոր կլինի խնդիրների լուծման մեթոդներն էլ գտնել»,- ասել է նորանշանակ մարզպետը։
Անդրադառնալով կադրային քաղաքականությանը՝ նա նշել է, որ նախապատրաստած կադրերի բանակ չունի։
«Իմ թիմը Շիրակի մարզն է, իմ թիմը Շիրակի մարզի բոլոր գրագետ, գործունյա մարդիկ են, ովքեր պատրաստ են մարզի զարգացման համար աշխատել»,- ասել է Հարությունյանը։
Հիշեցնենք, որ Կառավարության որոշմամբ՝ Տիգրան Պետրոսյանն իր դիմումի համաձայն այսօր ազատվել է Շիրակի մարզպետի պաշտոնից և նոր մարզպետ է նշանակվել Հովհաննես Հարությունյանը։ Նա մասնագիտությամբ վիրաբույժ է, «Քաղաքացիական պայմանագիր» կուսակցության անդամ։ 2016 թվականին եղել է Շիրակի մարզի «Բեռլին» պոլիկլինիկայի տնօրենը, 2018-ին նշանակվել «Սուրբ Գրիգոր Լուսավորիչ» ԲԿ-ի տնօրեն տեղակալ։ 2019թ․ էլ նշանակվել է նախ առողջապահության նախարարի խորհրդական, ապա՝ տեղակալ։
Էմմա Չոբանյան
