18.11.2024 | 17:43
«Չեն աշխատել, Փաշինյանն էլ հանել է», «Մարմնի մասերը փոխելուց ոչ մի բան չի փոխվի»․ հարցում՝ Երևանում
Պուտինը նշել է Ադրբեջանի կողմից խոցված ուղղաթիռի անձնակազմի զոհված անդամների անուններն ու հանձնարարել օգնել նրանց ընտանիքներին
Քաղաքականություն
10.11.2020 | 21:06
ՌԴ նախագահ Վլադիմիր Պուտինն այսօր երկրի Պաշտպանության նախարարության և ռազմարդյունաբերական համալիրի ձեռնարկությունների ղեկավարների հետ խորհրդակցության ժամանակ նշել է ադրբեջանական ԶՈՒ-ի կողմից խոցված և Հայաստանի տարածքում ընկած ռուսական Մի-24 ուղղաթիռի անձնակազմի զոհված անդամների անունները։ Այս մասին տեղեկանում ենք Կրեմլի պաշտոնական կայքում հրապարակված հաղորդագրությունից։
«Գիտեք, որ երեկ ողբերգական միջադեպի հետևանքով զոհվեցին մեր երկու ընկերները՝ օդաչուներ, որոնք ծառայում էին Հայաստանում ռուսական ռազմաբազայում։ Նրանք են անձնակազմի հրամանատար, մայոր Յուրի Վիկտորի Իշչուկը և ավագ լեյտենանտ Ռոման Վասիլիի Ֆեդինը»,- հայտնել է Պուտինը՝ հավելելով, որ տուժել է նաև մեկ օդաչու։
Խորհրդակցության մասնակիցները մեկ րոպե լռությամբ հարգել են զոհված օդաչուների հիշատակը։
Վլադիմիր Պուտինը նաև ՌԴ պաշտպանության նախարար Սերգեյ Շոյգուին հանձնարարել է օգնել ռուսական խոցված ուղղաթիռի զոհված անդամների ընտանիքներին։
«Նախարարին խնդրում եմ՝ օգնություն ցուցաբերել զոհվածների ընտանիքներին»,- ասել է ՌԴ նախագահը։
Հիշեցնենք, որ ռուսական Մի-24 ուղղաթիռը կործանվել է Երասխի մոտակայքում։ ՌԴ Պաշտպանության նախարարությունը հայտնել է, որ այն ուղեկցում էր ռուսական 102-րդ ռազմաբազայի ավտոշարասյունը Ադրբեջանի հետ սահմանից ոչ հեռու։ «Մի-24-ը գետնից կրակի է ենթարկվել զենիթահրթիռային համակարգերի կողմից: Հրթիռի հարվածի արդյունքում ուղղաթիռը կորցրել է կառավարումը և ընկել Հայաստանի տարածքում՝ լեռնային տեղանքում»,- ասվում է հաղորդագրությունում։
Ավելի ուշ ադրբեջանական կողմը խոստովանեց ռուսական ուղղաթիռը խոցելու փաստը։
