Հասարակություն
14.12.2017 | 19:21ՀՀ կառավարությունը դեկտեմբերի 14-ի նիստում որոշում կայացրեց բնակարանի կարիքավոր զոհված (մահացած), առաջին, երկրորդ և երրորդ կարգի հաշմանդամություն ունեցող զինծառայողների ընտանիքներին հատկացնել բնակարան կամ դրանց գնման վկայագրեր: 51 բնակարան և 172 վկայագիր տրամադրելու նպատակով հատկացվել է 1.5 մլրդ դրամ: Ու եթե միլիարդը բարեհունչ է, ապա մասերի բաժանելով՝ ծիծաղելի թիվ է ստացվում: 587 մլն դրամ է հատկացվել 51 բնակարանների ձեռք բերման համար, միջինացված՝ յուրաքանչյուր բնակարանին 11 մլն 515 հազար դրամ, որը կազմում է 24 հազար դոլար: 912 մլն 740,0 հազար դրամ է հատկացվել 172 վկայագրերի համար, այսինքն՝ մեկ վկայագրի համար՝ 5 մլն 306 հազար 627 դրամ կամ 11 հազար դոլար:
Բայց նկատի ունենանք, որ պետք է հատկացվեն 1-3 սենյականոց բնակարաններ, ինչը նշանակում է, որ մեկ սենյականոցի համար 5 մլն դրամից շատ ավելի քիչ է նախատեսված: Ընդ որում, սա Երևանի համար է ու դժվար է պատկերացնել, որ 11 հազար դոլարով հնարավոր է Երևանում բնակարան գնել:
Ըստ ՊՆ հիմնավորման՝ հիմք են ընդունվել ՀՀ կառավարությանն առընթեր անշարժ գույքի կադաստրի պետական կոմիտեի կողմից ներկայացված 2017թ-ի 3-րդ եռամսյակի ընթացքում ձևավորված բազմաբնակարան բնակելի շենքերի բնակարանների շուկայական միջին գները: Նման միջին գին, սակայն, գոյություն ունենալ չի կարող: Զարմանալի է նաև, թե ինչու է վկայագրի համար կիսով չափ քիչ գումար նախատեսված, քան պատրաստի բնակարան տալու գումարն է:
Օրեր առաջ՝ դեկտեմբերի 6-ին, ՊՆ-ում վկայագրեր հանձնելու ժամանակ շահառուները դժգոհեցին գումարի չափից: Նախարարն ինքն էլ նշեց, որ հասկանում է՝ հեշտ չէ բնակարան գտնել այդ գումարով, այն էլ՝ բարվոք վիճակում գտնվող բնակարան:
Ո՞րն է ավելի խելամիտ՝ 2000 շահառուի աստիճանաբար ապահովել բնակարանո՞վ, թե՞ կանգնեցնել նոր անորոշության առաջ՝ տալով բնակարանի ընդամենը տանիքը կառուցելու գումար: Արդյո՞ք հնարավոր չէր խնդիրը լուծել դանդաղ, բայց լիարժեք: ՊՆ-ում հանդիպելով շահառուներին՝ Վիգեն Սարգսյանն ասաց, թե պետությունը մեծ պարտք ունի զոհված և հաշմանդամություն ունեցող զինծառայողների ընտանիքների առջև։ Արդյո՞ք սա պարտքը հատուցելու ամենալավ տարբերակն է:
Սևակ Հակոբյան
