Գյումրիի ավագանին նախկին ռադիոգործարանի շենքը կրկին հատկացրեց Վարդան Սրմաքեշի ընկերությանը․ արհեստագործական համալիր է կառուցվելու

Գյումրիի ավագանին այսօր տեղի ունեցած նիստում որոշեց շվեյցարահայ գործարար  Վարդան Սրմաքեշի «Ֆրանկ Մյուլլեր» ընկերությանն անհատույց օգտագործման իրավունքով անշարժ գույք տրամադրել։ Խոսքը քաղաքի Գործարանային փողոցի N 2/6 հասցեի շենքի կամ նախկին Ռադիոգործարանի շենքի մասին է, որը գտնվում է վթարային վիճակում, իսկ վերականգնման համար համայնքը բավարար միջոցներ և հնարավորություն չունի:

Նշենք, որ դեռ 2018 թվականին էր Գյումրիի ավագանին շենքը տրամադրել «Ֆրանկ Մյուլլեր» ընկերությանը՝ արհեստագործական կենտրոն հիմնելու համար, սակայն ներդրումներն ուշացնելու պատճառով ավագանին նախորդ որոշումն ուժը կորցրած էր ճանաչել և շենքը տրամադրել «Հայաստան» համահայկական հիմնադրամին։

Հիշեցնենք, որ ավագանին դեռ 2019-ի հունիսի 20-ի արտահերթ նիստում որոշել էր քաղաքի Բուլվարային թաղամասի Գործարանային փողոցի 2/4 հասցեում գտնվող նախկին ռադիոգործարանի հանրակացարանի երկու շենքերն անհատույց տրամադրել «Հայաստան» համահայկական հիմնադրամին՝ «Մեր Գյումրի» սոցիալական բնակարանաշինական ծրագրի համար: Սակայն շենքերի վթարայնության պատճառով ծրագրի մեկնարկը հետաձգվեց։ «Մեր Գյումրի» ծրագրի իրականացման համար ավագանին նոր տարածք հատկացրեց Մուշ-2 թաղամասում։

Այս ամենից հետո «Ֆրանկ Մյուլլեր» ընկերությունը կրկին դիմել է Գյումրու քաղաքապետարանին՝ շենքն իրենց տրամադրելու և նախորդ ծրագրի պես արհեստագործական կենտրոն ստեղծելու համար։

««Ֆրանկ Մյուլլերն» իր ծրագրերն է ներկայացրել՝ Գյումրիում իրականացնելու համար, ծրագրերից մեկն էլ նույն Գործարանային փողոցի նախկին ռադիոգործարանի շենքի վերականգման հարցն է։ Ծրագիր է ներկայացրել, որ այնտեղ ստեղծվի իր բոլոր ենթակառուցվածքներով բազմապրոֆիլ արհեստագործական համալիր, նաև ցանկություն կա հարակից տարածքում հետագայում բնակելի շինարարական աշխատանքներ կատարել»,- ասաց Գյումրու գլխավոր ճարտարապետ Հենրիկ Գասպարյանը։

Քաղաքապետ Սամվել Բալասանյանն էլ նշեց, որ ուզում են երկու շենքն էլ վերցնել, նաև հետագայում սոցիալական բնակարաններ կառուցել։ Ամեն շենքի համար մոտ 2 մլն դոլարի ներդրում են անելու և, ընդհանրապես, բավական հետաքրքիր ծրագիր է ներկայացրել ընկերությունը։

Ավագանու անդամ Լևոն Բարսեղյանի դիտարկմանը՝ կա՞ հստակ ժամանակացույց աշխատանքների իրականացման հետ կապված, Հենրիկ Գասպարյանն արձագանքեց, որ նախագծային աշխատանքները սկսվել են, էսքիզները կան։ Շենքը հատկացնելուց հետո էլ ժամանակացույցը կհստակեցվի և կկազմվի պայմանագիր։

Էմմա Չոբանյան