24.04.2026 | 23:32
Կապանում ջրանջատում կլինի
Արցախում կորոնավիրուսի տնտեսական հետևանքների չեզոքացմանն ուղղված միջոցառումների համար ավելի քան 76 միլիոն դրամ է հատկացվել
Տնտեսություն
21.07.2020 | 21:19
Արցախում նոր տիպի կորոնավիրուսի (COVID-19) տնտեսական հետևանքների չեզոքացմանն ուղղված միջոցառումների շրջանակում առաջին փուլի արդյունքներով հարկային մարմին է դիմել 1645 տնտեսվարող սուբյեկտ, որից բավարարվել է 1447-ի հայտը: «Արցախպրես»-ի հաղորդմամբ՝ այս մասին այսօր հրավիրված առցանց ասուլիսի ժամանակ հայտնել է ԱՀ ՊԵԿ նախագահի տեղակալ Արմինե Մուսայելյանը:
Նրա խոսքով՝ համավարակի բռնկումից հետո ԱՀ կառավարությունը նախաձեռնել է սոցիալական և տնտեսական հետևանքների չեզոքացմանն ուղղված մի շարք ծրագրեր: Տնտեսական բնույթի ծրագրերից որոշների իրականացումը բաշխվել է հարկային մարմնին: Խոսքը վերաբերում է միանվագ դրամաշնորհի և միանվագ դրամական օգնության տրամադրման ծրագրերին:
Մասնավորապես՝ ծրագրերը մեկնարկել են մայիսի 18-ից և ուղղված են եղել կորոնավիրուսից առավելապես տուժած ոլորտներին, այդ թվում՝ զբոսաշրջային և հյուրանոցային ծառայություններին, հանրային սննդի կազմակերպություններին, վարսավիրական ծառայությունների կամզակերպմանը, ուղևորափոխադրում իրականացնող կազմակերպություններին, մասնավոր մանկապարտեզներին, ստեղծագործական կենտրոններին, հանգստի և զվարժանքի օբյեկտների կազմակերպման գործունեություն իրականացնողներին, և մանրածախ առևտրին՝ մի շարք բացառություններով: Ընդհանուր առմամբ, առաջին փուլի արդյունքներով հատկացվել է 76 միլիոն 718 հազար դրամ:
Ա. Մուսայելյանը նշել է, որ երկրորդ փուլում որպես տուժած ոլորտներ են դիտվել լուսանկարչական, հարսանյաց զգեստների և այլ պարագաների գործունեությունը, կահույքի, բնակչության պատվերով գործող հագուստի, կոշիկի նորոգում իրականացնող, ինչպես նաև կենցաղային և այլ տեխնիկայի նորոգմամբ զբաղվող կազմակերպությունները:
Այս փուլի արդյունքներով նախատեսվում ծրագրում ընդգրկել 112 շահառուի: Եվս 118 սուբյեկտներ հնարավորություն կունենան ընդգրկվելու առաջին փուլի ծրագրում: Խոսքը վերաբերում է այն կազմակերպություններին, ովքեր չէին հասցրել դիմել: Ի դեպ, այդ նպատակով կառավարությունը երկարաձգել է դիմում-հայտերի ժամկետը՝ մինչև օգոստոսի 1-ը:
