Մշակույթ
23.06.2020 | 18:18
«Ոսկե գլոբուս» կինոմրցանակաբաշխությունը տեղի կունենա 2021 թվականի փետրվարի 28-ին։ Այս մասին հայտնում է Deutsche Welle-ն՝ հղում անելով մրցանակաբաշխության կազմակերպիչներին։
Սովորաբար, «Ոսկե գլոբուս»-ը տեղի է ունենում հունվարի սկզբին։ Կազմակերպիչների հայտարարության մեջ կորոնավիրուսային պանդեմիայի մասին չի նշվում, սակայն այն, աղբյուրի փոխանցմամբ, նման որոշում կայացնելու գլխավոր պատճառն է եղել:
Նշվում է, որ ԱՄՆ-ում այժմ փակ են կինոթատրոնները և նոր ֆիլմերի պրեմիերաների ժամկետները հետաձգվել են։ Բացի այդ, կինոստուդիաների մեծամասնությունում կորոնավիրուսային սահմանափակումները խախտել են նկարահանումների ժամանակացույցը։
Deutsche Welle-ն հայտնում է, որ այս տարի «Ոսկե գլոբուս»-ի շրջանակում մրցել կարող են այն ֆիլմերը, որոնց պրեմիերաներն արդեն նշանակված էին, սակայն չկայացան կորոնավիրուսային սահմանափակումների հետևանքով ու ցուցադրվեցին օնլայն կինոթատրոններում։
Նելլի Մելքոնյան
