Գագիկ Ծառուկյանը չի նահանջում. խմբակային բռնաբարության գործով դատախազին է դիմել. ՏԵՍԱՆՅՈՒԹ

Ազգային ժողովի պատգամավոր, ԲՀԿ ղեկավար Գագիկ Ծառուկյանի անվան հետ կապվող խմբակային բռնաբարության դատական ակտի հրապարակման հետ կապված նոր զարգացումներ կան: Ծառուկյանի պաշտպանական թիմը դիմել է գլխավոր դատախազին՝ պարզելու համար, թե ինչպես է 40 տարվա վաղեմության դատական վճիռը, որը կայացվել է փակ նիստում, հասանելի դարձել հանրությանը:

Հիշեցնենք, որ Ծառուկյանի կողմից կառավարության հրաժարականը պահանջելուց հետո սոցցանցերում, ապա մամուլում հրապարակվեցին Գագիկ Ծառուկյանի մասնակցությամբ 1979 թվականին տեղի ունեցած խմբակային բռնաբարության գործով դատավճռի «սքրինշոթերը»:

Հրապարակված փաստաթղթերի համաձայն՝ Գագիկ Ծառուկյանը և ևս երեք անձ 1979 թվականի հունիսի 6-ին Երևանի ռեստորաններից մեկում ծանոթացել են ազգությամբ ռուս  իգական սեռի երկու ներկայացուցիչների հետ, ապա նրանց տարել են Կոտայքի մարզ, որտեղ կիսակառույց շինությունում սեռական բռնության ենթարկել և կողոպտել:

Ի դեպ, այս թվականին Ծառուկյանն աշխատել է Կառավարական շենքերի պահպանման առանձին դիվիզիոնում՝ որպես միլիցիոներ, դատապարտվել է յոթ տարվա ազատազրկման:

Գագիկ Ծառուկյանի պաշտպան Էմին Խաչատրյանն ասաց՝ դատավճռի հանրայնացմամբ ապօրինի հրապարակվել են Ծառուկյանի անձնական կամ ընտանեկան կյանքի մասին տեղեկություններ: Նա նաև ընդգծում է, որ դռնփակ անցկացվող դատական նիստերը ու դրանց եզրափակիչ որոշումները հրապարակման ենթակա չեն։ Պաշտպանն այստեղ 308 հոդվածի՝ պաշտոնեական դիրքի չարաշահում է տեսնում:

Գագիկ Ծառուկյանի պաշտպանը Factor TV-ի հարցին ի պատասխան չասաց, թե ում պաշտոնեական դիրքի չարաշահմամբ է փաստաթղթերը հասանելի դարձել լրատվամիջոցներին: Հույս ունի, որ Գլխավոր դատախազությունը կտա բոլոր հարցերի պատասխանը:

Գագիկ Ծառուկյանին վերագրվող խմբակային բռնաբարությանը մասնակից լինելու մասին Հայկական ՍՍՀ Գերագույն դատարանի քրեական գործերի դատարանի 1979 թվականի վճիռը, ըստ Էմիլ Խաչատրյանի, 2001 թվականին Վճռաբեկ դատարանի որոշմամբ բեկանվել է, և Գագիկ Ծառուկյանն արդարացվել է:

Նշյալ վճռից մի հատված նաև հրապարակվել է ֆեյսբուք սոցիալական ցանցում՝ ԲՀԿ-ական պատգամավորների կողմից: Պաշտպանը, սակայն, նշում է, որ նախորդ վճիռը՝ ամենայն՝ 18+ մանրամասնությամբ հրապարակած լրատվամիջոցները, որոնց թվում է նաև վարչապետի ընտանիքին պատկանող «Հայկական ժամանակը», չեն հրապարակում անկախ Հայաստանի Վճռաբեկ դատարանի վճիռը:

Թեև Խաչատրյանը մեր ճշտող հարցին ի պատասխան ասաց, որ օրենքով սահմանված կարգով հերքում չեն պահանջել լրատվամիջոցից։

«Հայկական Ժամանակի» խմբագրությունից Factor TV-ի հետ զրույցում նշեցին, որ թեման չեն մեկնաբանում:

ԱԺ պետաիրավական հարցերի մշտական հանձնաժողովի իմքայլական պատգամավոր Վահագն Հովհակիմյանը Factor TV-ի հետ զրույցում անդրադառնալով Ծառուկյանի գործով 2001 թվականին Վճռաբեկ դատարանի որոշմանը, ասաց՝ անկախ Հայաստանի դատարանը չէր կարող անդրադառնալ ՍՍՀ Գերագույն դատարանի քրեական գործերի դատարանի վճռին:

ԱԺ պետաիրավական հանձնաժողովի մեկ այլ անդամ, ԲՀԿ-ական Գևորգ Պետրոսյանից հետաքրքրվեցինք, թե ինչպես է 2001-ին Ծառուկյանն արդարացվել, երբ 1979 թվականին կայացված վճիռը բողոքարկման ենթակա չէր: Ըստ նրա, եթե նոր հանգամանքներ են երևան գալիս, քրեական դատավարության օրենսդրությունը թույլ է տալիս վերանայել այդ ակտերը: Պետրոսյանը չի կիսում Վահագն Հովակիմյանի այն տեսակետը, որ անկախ Հայաստանի դատարանը չէր կարող անդրադառնալ ՍՍՀ Գերագույն դատարանի քրեական գործերի դատարանի վճռին:

«Իմ քայլը» խմբակցության պատգամավոր Վահագն Հովակիմյանի համար տարակուսելի է նաև այն, որ Ծառուկյանը և նրա պաշտպանական թիմը այս փաստաթղթերի հրապարակման համար հանցագործության մասին հաղորդում են ներկայացրել: Նա հիշում է, որ մամուլում Ծառուկյանի դատավճիռը 90-ականների վերջին կամ 2000-ականների սկզբին արդեն իսկ հրապարակվել է: Հովակիմյանը կարծում է՝ Ծառուկյանն այսպիսով փորձում է սեփական կենսագրությունը ջնջել:

Գլխավոր դատախազությունից Factot TV-ին փոխանցեցին, որ հանցագործության մասին Ծառուկյանի պաշտպանի հաղորդումը դեռ չեն ստացել:

Մանրամասները՝ տեսանյութում:

Նարեկ Կիրակոսյան