27.04.2024 | 20:58
Հետաքրքիր է՝ Սևանի ափին ծիրանի ծառ. Նիկոլ Փաշինյան. ՏԵՍԱՆՅՈՒԹ
Աշխարհի խաղաղասեր երկրների ցանկում Հայաստանը 99-րդն է․ հրապարակվել է Խաղաղասիրության համաշխարհային վարկանիշի 2020թ․ զեկույցը
Քաղաքականություն
10.06.2020 | 19:27
Ավստրալիայի Էկոնոմիկայի և խաղաղության ինստիտուտի վերլուծական կենտրոնը հրապարակել է Խաղաղասիրության համաշխարհային վարկանիշի 2020 թվականի զեկույցը։
163 երկրների շարքում Հայաստանը 99-րդն է։ Երկրի վարկանիշը բարձրացել է 15 հորիզոնականով: Հարևան Վրաստանը 95-րդ տեղում է, Ադրբեջանը՝ 120-րդ, Իրանը՝ 142-րդը, Թուրքիան՝ 150-րդը։ Խաղաղասիրության վարկանիշային աղյուսակում տարածաշրջանի ամենացածր ցուցանիշը Ռուսաստանինն է։ Այն 154-րդ տեղում է։
Զեկույցը կազմելիս հաշվի են առնվում երկրի ներքին և արտաքին հակամարտությունները, հասարակական ապահովությունն ու անվտանգությունը, ռազմականացումը և այլ չափանիշներ։
Զեկույցի հեղինակներն ընդգծում են, որ վերջին տարիներին Հայաստանն ու Ադրբեջանը բարելավել են հարաբերությունները։ Նշվում է նաև, որ Հայաստանը մեծ առաջընթաց է գրանցել ապահովության և անվտանգության չափանիշով։ Հայաստանում 35%-ով նվազել է բանտարկյալների թիվը և այժմ կազմում է 76 ազատազրկված 100 հազար մարդու հաշվով։ Այժմ ազատազրկված անձանց ցուցանիշով Հայաստանն առաջատարն է Եվրասիական տարածաշրջանում։ Հայաստանը բարելավել է դիրքերը նաև սպանությունների նվազման, քաղաքական կայունության և ահաբեկչության ազդեցության անկման ցուցանիշներով։
Այդուհանդերձ, ըստ զեկույցի, Հայաստանը, որոշ ցուցանիշներով, հետընթաց է գրանցել։ Նշվում է, որ, չնայած կառավարության միջամտության ավելացման հաշվին քաղաքական անկայունությունը բարելավվել է, մեծացել է քաղաքական ճնշումը։ Որպես հետընթաց գրանցած չափանիշ՝ զեկույցում նշում է նաև ռազմականացումը։
Հավելենք, որ ըստ Խաղաղասիրության համաշխարհային վարկանիշի 2020 թվականի զեկույցի՝ աշխարհի ամենախաղաղասեր երկրներ են ճանաչվել Իսլանդիան, Նոր Զելանդիան, Պորտուգալիան, Ավստրիան ու Դանիան։ Ամենից ոչ խաղաղասեր երկրներ են ճանաչվել Եմենը, Հարավային Սուդանը, Իրաքը, Սիրիան և Աֆղանստանը։
Նելլի Մելքոնյան
