Ոստիկանը հարվածում է հեռախոսով նկարահանող քաղաքացուն․ ՆԳՆ-ն չի մեկնաբանում

Երեկ համացանցում տարածվեց մի տեսանյութ, որում ոստիկանության ծառայողներն ավտոմեքենայից բռնի կերպով իջեցնում են քաղաքացուն և «փռում» ասֆալտին։ Պարեկային ծառայողները մոտենում են մեքենային, բացում դուռը և քաշքշելով դուրս են հանում վարորդին։ Մինչ այդ, սակայն, հեռակա երկխոսություն է ընթանում վարորդի և պարեկների միջև։ Պարեկները մեքենայի ուղղությամբ են սկսում գնալ վարորդի կողմից հնչող ինչ-որ արտահայտությունից հետո, որը լսելի չէ։ Վարորդին բռնի կերպով մեքենայից դուրս է հանում պարեկային չորս ծառայող։ Քաղաքացուն գցում են գետնին. տեսանելի է, որ պարեկներից առնվազն մեկը ծնկով հենվում է ասֆալտին պառկած վարորդի վրա, մյուսը ձեռնաշղթաներ է հագցնում։ Այս ֆոնին անցնում է պաշտոնական ավտոշարասյուն։

Ներքին գործերի նախարարությունից երեկ անդրադարձել էին այս տեսանյութին և պարզաբանել հետևյալը․ «Սոցկայքերում պարեկների մասնակցությամբ տարածված տեսանյութի առնչությամբ հայտնում ենք, որ պետական արարողակարգային միջոցառումների շրջանակում, երբ ոստիկանության ծառայողները ապահովել են մեքենաների շարասյան անցումը, վարորդներից մեկը հայհոյանք է հնչեցրել: Նա բերման է ենթարկվել Համայնքային ոստիկանության Կենտրոնական բաժին: Պարզաբանումներից հետո ազատ է արձակվել»:

Քաղաքացուն մեքենայից դուրս բերելն ու ասֆալտին տապալելն այդ կարճ հոլովակի միակ ուշագրավ դրվագը չէ։ Քիչ հեռու ոստիկանության ծառայողը բռնություն է կիրառում տեղի ունեցողը նկարահանող մեկ այլ քաղաքացու նկատմամբ։ Նա մոտենում է հեռախոսով նկարահանող քաղաքացուն և երկու անգամ հարվածում այն ձեռքին, որով պահում է հեռախոսը։ Քաղաքացին շարունակում է նկարահանել, նրան մոտենում է մեկ այլ ծառայող, որի ձեռքին մահակ կա և այն թափահարելով ինչ-որ բան է ասում քաղաքացուն։ Այս ճնշումներից հետո քաղաքացին դադարեցնում է նկարահանումը։

Տեսարանը նկարահանող քաղաքացուն ֆիզիկական բռնության ենթարկելու վերաբերյալ Factor.am-ը պարզաբանում խնդրեց ՆԳՆ-ից։ Կառույցից փոխանցեցին, որ այլ ասելիք չունեն։

Նարեկ Կիրակոսյան