Քաղաքականություն
03.04.2025 | 13:59
Ռուսաստանը վստահ է, որ Ադրբեջանում «Ռուսական տան» շուրջ ստեղծված իրավիճակին լուծում կգտնվի։ Այս մասին ՌԻԱ Նովոստիին ասել է ՌԴ ԱԳ փոխնախարար Միխայիլ Գալուզինը։
«Ես վստահ եմ, որ մենք լուծում կգտնենք։ Լուծում գտնելու համար պետք է երկխոսություն վարել։ Մենք երբեք չենք դադարեցրել երկխոսությունն Ադրբեջանի հետ»,- ասել է Գալուզինը։
Նա հիշեցրել է, որ Մոսկվային և Բաքվին կապում են դաշնակցային հարաբերությունները, և «դրանով շատ բան է ասված»։
«Ուստի մենք կցանկանայինք մեր համատեղ օրակարգում առկա կամ նոր ի հայտ եկած հարցերը լուծել հենց դաշնակցային համագործակցության ոգով: Իմ կարծիքով՝ դա ենթադրում է, ի թիվս այլ բաների, մշակութային և հումանիտար ոլորտում զարգացած, լայնածավալ, բազմազան փոխանակումներ։ Համոզված եմ, որ եթե ելնենք մեր դաշնակցային համագործակցությունից, մեր մշակութային կապերի հարուստ պատմությունից, ապա «Ռուսական տան» խնդրին երկուստեք ընդունելի լուծում կգտնենք»,- ընդգծել է ՌԴ ԱԳ փոխնախարարը։
Հիշեցնենք, որ Ադրբեջանի իշխանությունները որոշել են փակել Բաքվի «Ռուսական տունը»։
Թարգմանությունը՝ Էմմա Չոբանյանի
