09.06.2026 | 00:17
Մարկո Ռուբիոն շնորհավորել է Փաշինյանին
Բաքվում «Ռուսական տան» շենքից ցուցանակները հանվել են, աշխատակիցներն ազատել են տարածքը․ ՏԵՍԱՆՅՈՒԹ
Քաղաքականություն
12.02.2025 | 13:05
Բաքվի կենտրոնում գտնվող շենքից, որտեղ գործում էր «Ռուսական տունը», ռուսերենով և ադրբեջաներենով «Ռուսական տուն» գրությամբ ցուցանակներն ապամոնտաժվել են։ Ադրբեջանական լրատվամիջոցների հաղորդմամբ՝ «Ռուսական տան» աշխատակիցներն ազատել են տարածքը։
Հիշեցնենք՝ 2025 թվականի փետրվարի 3-ին Ադրբեջանի ԱԳՆ-ն ռուսական կողմին նոտա էր ուղարկել «Ռուսական տան» գործունեության դադարեցման մասին։ Բաքուն հայտնել էր, որ «Ադրբեջանում «Ռուսական տան» գործունեությունը դադարեցնելու՝ ադրբեջանական կողմի որոշման համաձայն՝ ռուսական կողմից ակնկալվում է համապատասխան միջոցներ ձեռնարկել այդ ուղղությամբ»։
Ի պատասխան՝ «Ռուսական տունը» հայտարարություն էր տարածել, որ քայլեր է ձեռնարկում Ադրբեջանում իր գործունեությունը դադարեցնելու համար։
«Ադրբեջանի արտաքին գործերի նախարարության պահանջի կապակցությամբ «Ռոսսոտրուդնիչեստվո»-ի Բաքվում «Ռուսական տուն» ներկայացուցչությունը միջոցներ է ձեռնարկում՝ դադարեցնելու իր գործունեությունը»,- ասվում է կառույցի հայտարարության մեջ։
Թարգմանությունը՝ Էմմա Չոբանյանի
