30.04.2026 | 01:05
Չեմպիոնների լիգա․ «Աթլետիկոն» ու «Արսենալը» չպարզեցին հաղթողին․ ՏԵՍԱՆՅՈՒԹ
Ֆրանսիայի և Թուրքիայի ԱԳ նախարարներն ընդգծել են՝ ՀՀ-ի և Ադրբեջանի հարաբերությունները պետք է կարգավորվեն երկրների տարածքային ամբողջականության ու ինքնիշխանության հարգմամբ
Քաղաքականություն
03.04.2025 | 15:26
Պաշտոնական այցով Փարիզում գտնվող Թուրքիայի ԱԳ նախարար Հաքան Ֆիդանը հանդիպել է Ֆրանսիայի ԱԳ նախարար Ժան Նոել Բարրոյի հետ։ Թուրքական լրատվամիջոցների հաղորդմամբ՝ հանդիպման ընթացքում քննարկվել են Թուրքիայի և Ֆրանսիայի երկկողմ հարաբերությունները, տարածաշրջանային և միջազգային ընթացիկ զարգացումները, մասնավորապես, Թուրքիա-ԵՄ հարաբերությունները, եվրոպական անվտանգությունը, Ուկրաինայում պատերազմը, Գազայի հատվածը և Սիրիան։
Հաղորդվում է, որ Ֆիդանը կմասնակցի նաև ապրիլի 3-4-ին Բրյուսելում կայանալիք ՆԱՏՕ-ի ԱԳ նախարարների հանդիպմանը։ Թուրքիայի ԱԳՆ աղբյուրներից ստացված տեղեկատվության համաձայն՝ հանդիպումը ԱՄՆ նոր վարչակազմի և այլ դաշնակիցների միջև առաջին կոլեկտիվ խորհրդակցության առիթ է լինելու։
Ֆրանսիայի ԱԳՆ-ն էլ հաղորդում է, որ երկու երկրների նախարարները վերահաստատել են հրադադարի մոնիթորինգի ուղղությամբ աշխատելու և Ուկրաինայի անվտանգության ամուր երաշխիքների վրա հիմնված արդար, համապարփակ և տևական խաղաղության հաստատման ուղղությամբ աշխատելու անհրաժեշտությունը։ Նրանք նաև քննարկել են Սիրիայում տիրող իրավիճակն ու արդար և ընդգրկուն քաղաքական անցմանն աջակցելու կարևորությունը, որը կհամապատասխանի սիրիացի ժողովրդի ձգտումներին և կհարգի բոլոր սիրիացիների իրավունքները:
Հանդիպմանը Բարրոն և Ֆիդանը քննարկել են նաև Հարավային Կովկասում իրավիճակը։
«Կովկասի հետ կապված՝ նախարարներն ընդգծել են, որ Հայաստանի և Ադրբեջանի միջև հարաբերությունների կարգավորումը՝ հարգելով երկու պետությունների տարածքային ամբողջականությունն ու ինքնիշխանությունը, պետք է հնարավորություն տա Հարավային Կովկասին դառնալ խաղաղության, ինտեգրման և համագործակցության տարածք»,-ասվում է Ֆրանսիայի ԱԳՆ հայտարարության մեջ։
Երկու նախարարները քննարկել են նաև Եվրամիության և Թուրքիայի հարաբերությունները։ Բարրոն հայտնել է Ֆրանսիայի խորը մտահոգությունը Թուրքիայում վերջին քաղաքական զարգացումների կապակցությամբ և կրկնել, որ Ֆրանսիան հավատարիմ է մնում օրենքի գերակայության, ժողովրդավարական սկզբունքների և բազմակարծության հարգմանը։
Թարգմանությունը՝ Էմմա Չոբանյանի
