«Տուն ենք ուզում վերադառնալ»․ ռուս-ադրբեջանական սահմանին մնացած ադրբեջանցիները հացադուլ են անում

Ադրբեջանի քաղաքացիները, որոնք ապրում են Դաղստանի հետ սահմանին գտնվող  Կուլար գյուղի վրանային ճամբարում, 4-րդ օրն է՝ հացադուլ են անում։ Ակցիան անցկացվում է «Տուն ենք ուզում վերադառնալ» կարգախոսով։ Այս մասին հաղորդում են ադրբեջանական լրատվամիջոցները։

Հավաքվածներն Ադրբեջանի ու Ռուսաստանի իշխանություններից պահանջում են հարցն արագ կարգավորել, որպեսզի կարողանան անցնել սահմանը։ Հացադուլին անընդհատ կամ հերթափոխով մասնակցում է մոտ 200 մարդ։

Լրատվամիջոցների փոխանցմամբ՝ կան մարդիկ, որոնք մեկ ամսից ավելի է՝ ապրում են վրանային ճամբարում, որոշներն էլ՝ անձնական մեքենաներում, կիսակառույցներում, պոլիէթիլենից պատրաստված կառույցներում։

Նշենք, որ կորոնավիրուսի տարածման պատճառով ռուս-ադրբեջանական սահմանը փակ է։ Արդյունքում էլ հարյուրավոր ադրբեջանցիներ մնացել են սահմանին՝ առանց սեփական պետության օգնության։ Վերջին 20 օրվա ընթացում 271 մարդ սահմանն անցել է, սակայն նոր եկածների շնորհիվ ռուս-ադրբեջանական սահմանին կուտակվել է 650-700 մարդ։

«Մենք հոգնել ենք ապրել այստեղ՝ դաշտում։ Ցերեկն անտանելի շոգ է, լողանալու հնարավորություն չկա, նորմալ սնունդ չկա, շատերի մոտ փող էլ չի մնացել»,- Turan լրատվական գործակալությունը մեջբերում է ակցիայի մասնակիցներից մեկին։

«Кавказский Узел»-ի հետ զրույցում էլ Բաքվի բնակիչ Նամիկն ասել է, որ արդեն երկու ամիս է՝ Դաղստանում է։

«Մենք ուզում ենք տուն գնալ։ Ոչինչ ավելի չենք ուզում։ Ոչ մեկին ոչինչ չենք ուզում ապացուցել։ Մեզ համար որոշել ենք՝ կա՛մ այստեղ սովից կմեռնենք, կա՛մ տուն կգնանք»,- ասել է տղամարդը՝ նշելով, որ ադրբեջանական իշխանությունները դեռ 2 շաբաթ առաջ են մարդկանց խոստացել տանել։

«10-15 օր կարելի է համբերել, բայց կան մարդիկ, որոնք 2 ամիս այստեղ են։ Մեզ մոտ եկան իշխանության ներկայացուցիչները, խոստացան երեք օրվա ընթացքում դուրս հանել այստեղից։ Բայց արդեն 2 շաբաթ է անցել։ Այդ ընթացքում միայն 120 մարդ է անցել, այն էլ՝ կանայք ու երեխաներ, ծերերն ու հիվանդները։ Մենք համաձայն ենք, որ նրանց առաջին հերթին պիտի տանել, բայց մեզ էլ այնքան երկար այստեղ թողնելը ճիշտ չէ»,- ասել է քաղաքացին։

Նշենք նաև, որ ադրբեջանական իշխանությունների ներկայացուցիչները դեռ որևէ կերպ չեն արձանգանքել սեփական քաղաքացիների բողոքի ակցիային։

Էմմա Չոբանյան