Վրաստանի ԿԸՀ նախագահի վրա սև հեղուկ են լցրել․  ամփոփվել  են խորհրդարանական ընտրությունների արդյունքները

ԿԸՀ-ում ընթացիկ ընտրությունների ամփոփիչ նիստում բանավոր բախում է տեղի ունեցել Գիորգի Կալանդարիշվիլիի և «Միասնություն-Ազգային շարժում» կուսակցության ներկայացուցիչ Դավիթ Կիրթաձեի միջև․ գրում է Վրաստանի Հանրային ՀԸ-ն։

Նիստում Դավիթ Կիրթաձեն խոսք է խնդրել ընթացակարգի վերաբերյալ։ Կանոնակարգի ժամկետի ավարտից հետո ԿԸՀ նախագահ Գիորգի Կալանդարիշվիլին անջատել է խոսափողը, ինչի արդյունքում վիճաբանություն է սկսվել։

Դրանից հետո Կիրթաձեն բաժակով Կալանդարիշվիլիի վրա լցրել է անհայտ նյութ, հավանաբար ներկ։

Վրաստանի տասնմեկերորդ գումարման խորհրդարանում ընտրությունների վերջնական արդյունքներով 150 մանդատից 89-ը ստացել է «Վրացական երազանք-Ժողովրդավարական Վրաստան» իշխող կուսակցությունը։

«Վրաստանի կենտրոնական ընտրական հանձնաժողովը նոյեմբերի 16-ին կայացած նիստում ամփոփել է ընտրությունների վերջնական արդյունքները։ 150 մանդատից 89-ը ստացել է «Վրացական երազանք-Ժողովրդավարական Վրաստան» կուսակցությունը: Մնացած 61 մանդատները բաշխվել են հետևյալ կերպ. «Փոփոխությունների կոալիցիան» («Ախալի», «Գիրչի՝ ավելի շատ ազատություն», «Դրոա») ստացել է 19 մանդատ, «Միասնություն՝ ազգային շարժում» («Միացյալ ազգային շարժում», «Ագմաշենեբելի ռազմավարություն», «Եվրոպական Վրաստան»)՝ 16 մանդատ, «Ուժեղ Վրաստան» («Լելոն Վրաստանի համար», «Ժողովրդի համար», «Ազատության հրապարակ», «Քաղաքացիներ») – 14, և «Վրաստանի համար»՝ 12 մանդատ», – հայտնել են Վրաստանի ԿԸՀ-ից։

Վերջինիս փոխանցմամբ՝ այսպիսով, Վրաստանի իշխող կուսակցությունը ռեկորդ է սահմանել և ընտրությունների արդյունքներից հետո կարողացել է չորրորդ անգամ պահպանել իշխանությունը՝ ստանալով ընտրողների մոտ 54 տոկոսի աջակցությունը։

Հիշեցնենք, որ Վրաստանում խորհրդարանական ընտրություններն անցկացվել են հոկտեմբերի 26-ին։