Թուրքիայի նախագահականը հերքում է Էրդողանի և նրա դաշնակից Բահչելիի միջև տարաձայնությունները քրդական հարցի շուրջ

Թուրքիայի նախագահի խորհրդական Մեհմեթ Ուչումը հերքել է երկրի ղեկավար Ռեջեփ Թայիփ Էրդողանի և «Ազգայնական շարժում» կուսակցության (MHP) առաջնորդ Դևլեթ Բահչելիի միջև տարաձայնությունների մասին պնդումները՝ կապված քրդական հարցի վերաբերյալ Բահչելիի վերջին հայտարարությունների հետ, գրում է Bianet-ը։

Ekol TV-ի եթերում Ուչումը պարզաբանել է, որ Բահչելիի առաջարկն այն մասին, որ Քուրդիստանի աշխատավորական կուսակցության (PKK) բանտարկված առաջնորդ Աբդուլլահ Օջալանը կարող է ելույթ ունենալ խորհրդարանում՝ հայտարարելու խմբավորման լուծարման մասին, հիպոթետիկ է և իրավաբանորեն անհավանական:

«Որպեսզի նման սցենարն իրականանա, պետությունը պետք է իրավական դաշտ ստեղծի»,- ասել է նա՝ հավելելով, որ նման գործողությունը կախված կլինի «ահաբեկչությունից զերծ Թուրքիայի» ձեռքբերումից։

Ուչումը նաև հերքել է լուրերը, թե Բահչելին իր հայտարարություններն արել է առանց Էրդողանի իմացության։

«Բահչելիի և նախագահ Էրդողանի միջև ներդաշնակության և համագործակցության արտասովոր մակարդակ կա։ Լուրերը, որ Բահչելիի մեկնաբանություններն արվել են առանց նախագահի գիտության, անհիմն են և ամբողջովին սադրիչ։ Դա մի պատմություն է, որն ուղղված է պառակտում ստեղծելուն»,- նշել է նա։

Էրդողանի և Բահչելիի միջև տարաձայնությունների մասին լուրերը տարածվել են այն բանից հետո, երբ հոկտեմբերին Բահչելիի հայտարարությունները բանավեճ առաջացրեցին քրդական հարցի վերաբերյալ հնարավոր նոր խաղաղ գործընթացի շուրջ:

Թարգմանությունը՝ Էմմա Չոբանյանի