Երբ ուժ չենք կիրառում, ասում են՝ մեղմ եք, փափուկ խաղալիք եք, ուժ ենք կիրառում, ասում են՝ բռնություն. ՏԵՍԱՆՅՈՒԹ

Խորհրդարանական հանձնաժողովների համատեղ նիստի ժամանակ «Լուսավոր Հայաստան» խմբակցության պատգամավոր Անի Սամսոնյանը ոստիկանապետ Արման Սարգսյանին հարց ուղղեց առանց դիմակի քաղաքացուն բռնի ուժով բերման ենթարկելու մասին համացանցում տարածված և աղմուկ բարձրացրած տեսանյութի մասին՝ հետաքրքրվելով՝ արդյո՞ք իրավաչափ է համարում ոստիկանների գործողություններն ու արդյո՞ք ծառայողական քննություն է նշանակվելու։

Ոստիկանապետն ասաց՝ անպայման ստուգվելու է իրավապահների գործողությունների իրավաչափությունը։

«Բայց շատ իրավաչափ եմ համարում, որովհետև քաղաքացուն ընդամենը ասում են՝ կատարիր պարետի որոշման պահանջները։ Եվ այն քաղաքացին, որը համակեցության կանոններից, համընդհանուր նորմերից և մյուս պահանջներից սկսած՝ փորձում է ընդվզել և ոստիկանին հրահրելով՝ փորձել ներքաշել ինչ-որ բանի մեջ, կներեք, բայց, ես հիմա կանխակալ դուրս չգամ, ճիշտ են անում»,- ասաց նա։

Արման Սարգսյանն ասաց՝ այդ քաղաքացու անձի հետ կապված որոշակի տվյալներ ունի, բայց ճիշտ չի համարում բարձրաձայնել։

«Հույս ունեմ, որ Ոստիկանության ծառայողները նույն տրամաբանությամբ, ովքեր կխախտեն օրենքը, որտեղ կգտնեն, որ դրա պահանջը կա և օրենքով ճիշտ է ուժ կիրառելը, պետք է ուժ կիրառեն։ Կներեք, մենք երկու ծայրահեղության մեջ ենք ընկնում․ երբ ուժ չենք կիրառում, մեզ ասում են՝ մեղմ եք, թավշյա եք, փափուկ խաղալիք եք, երբ ուժ ենք կիրառում, դիտարկում են որպես բռնություն»,- ասաց ոստիկանապետը։

Մանրամասները՝ տեսանյութում։