09.12.2025 | 23:31
Եվրոպական հանձնաժողովը հետաքննություն է սկսել Google-ի դեմ
Ժամանակն է, որ անցնենք մոդուլային ծրագրերի և որպես օրինակ վերցնենք գերմանական դուալ կրթության մոդելը. ԿԳ նախարար
Հասարակություն
30.10.2017 | 19:04
Հոկտեմբերի 29-ից նոյեմբերի 3-ը պաշտոնական այցով Երևանում է գտնվում Գերմանիայի Դաշնության երկրամասերի մշակույթի և լուսավորության նախարարների համաժողովի գլխավոր քարտուղար Ուդո Միխալիկիի գլխավորած պատվիրակությունը: Այսօր ԳԴՀ պատվիրակության անդամները հանդիպում են ունեցել ՀՀ կրթության և գիտության նախարար Լևոն Մկրտչյանի հետ:
Նախարարի խոսքով` ԳԴՀ գլխավոր քարտուղարի այցը ևս մեկ հնարավորություն է` ճշգրտելու կրթության և գիտության ոլորտում երկու երկրների միջև համագործակցության ուղղությունները: Լևոն Մկրտչյանը բարձր է գնահատել Գերմանիայի դաշնային մակարդակով պաշտոնյաի այցը Հայաստան` այն բնորոշելով «ամփոփիչ»:
Հայաստանն ավանդաբար համագործակցում է ԳԴՀ Սաքսոն Անհալթի և Բավարիայի երկրամասերի կրթության համակարգերի հետ և այս տարվա ընթացքում արդեն ՀՀ ԿԳ նախարարությունն ընդունել է այդ երկրամասերի կրթության նախարարներին: Լևոն Մկրտչյանը կրթական համագործակցության ծրագրերից առանձնացրել է միջին մասնագիտական կրթության ոլորտում գերմանական փորձը՝ հատկապես դուալ կրթության կազմակերպման գործում: Նախարարը նշել է, որ հայկական կողմը շահագրգռված է գերմանական մոդելը Հայաստանի ՄԿՈՒ հաստատություններում ներդնելու ուղղությամբ: Այս համատեքստում նա կարևորել է վերանայել ԵՄ շրջանակներում իրականացվող ծրագրերի արդյունավետությունը. «Կարծում եմ ժամանակն է որ խորհրդատվություններից անցնենք մոդուլային ծրագրերի և որպես օրինակ վերցնենք գերմանական դուալ կրթության մոդելը»,-նշել է Լևոն Մկտչյանը:
ԳԴՀ նախարարների համաժողովի գլխավոր քարտուղար Ուդո Միխալիկին իր հերթին նշել է, որ ինքը նախարարների հանձնաժողովի առաջին ներկայացուցիչն է, ով այցելում է Հայաստան և մեր երկիր է ժամանել համագործակցության ամրանդման և զարգացման ծրագրերով: Նա ընդգծել է, որ Գերմանիայի Սաքսոն Անհալթի դպրոցների դասագրքերում ներառված է հայոց ցեղասպանության մասին նյութը որպես կրթական ծրագրի բաղադրիչ: ՀՀ կրթության և գիտության նախարարը, շնորհակալություն հայտնելով, գերմանական կողմին նման նախաձեռնության համար, տեղեկացրել է, որ եկող տարի նախատեսվող Հայոց ցեղասպանության գլոբալ համաժողովն անցկացվելու է «Կրթության դերը ցեղասպանության կանխարգելման գործում» խորագրի ներքո: Անդրադառնալով ՄԿՈՒ ոլորտի համագործակցությանը՝ ԳԴՀ պաշտոնյան տեղեկացրել է, որ դուալ կրթությունը Գերմանիայի կառավարությունը ներկայում մշակվող շրջանակային ուսուցման ծրագրի կարևոր ուղղություններից է և այս հարցում գերմանական կողմը պատրաստակամ է աջակցել Հայաստանին: Հանդիպման ընթացքում գլխավոր քարտուղար Ուդո Միխալիկին անդրադարձել է Հայաստանում գերմաներեն լեզվի ամրապնդման և տարածման հարցերին: Ի պատասխան Լևոն Մկրտչյանն ընդգծել է, որ մշակվել է «Հանրակրթական ծրագրեր իրականացնող ուսումնական հաստատություններում օտար լեզուների դասավանդման հայեցակարգը», որը նախատեսում է հիմնել նաև օտար լեզուների խորացված ուսուցմամբ դպրոցներ: Այն ենթադրում է ոչ միայն լեզվի ուսուցում, այլ տվյալ երկրի մշակույթի, գրականության, աշխարհագրության, պատմության հատուկ դասընթացներ և այս հարցում ևս ՀՀ ԿԳՆ-ն կարևորում է գերմանական կողմի աջակցությունը: «Մենք ունենք տարածքներ, որտեղ ավանդաբար գերմաներեն են ուսուցանում: Պետք է կարողանանք այդ տարածքների դպրոցները պահպանել, ստեղծել գերմաներեն լեզվի դպրոցների ցանց և զարգացնել դրանք»,- նշել է ԿԳ նախարարը՝ միաժամանակ կարևորելով Գյոթեի ինստիտուտի մշտական ներկայացուցչության հիմնումը Հայաստանում: Հանդիպման ընթացքում կողմերն անդրադարձել են նաև համագործակցությանն առնչվող մի շարք այլ հարցերի:
