19.12.2025 | 23:33
ԱՄՆ-ի, Ռուսաստանի և Ուկրաինայի բանակցությունների նոր փուլը տեղի կունենա ԱՄՆ-ում առաջիկա օրերին
«Գողական ռազբորկա»՝ երեխաների կատարմամբ. ինչ է քարոզում Գոռ Վարդանյանի նոր սերիալը. ՏԵՍԱՆՅՈՒԹ
Հասարակություն
13.11.2024 | 20:15
Գոռ Վարդանյանի նոր՝ «Կայսրության թևերը» սերիալում անչափահասների կողմից փողոցային բառապաշարի օգտագործումը և քրեական ենթամշակույթին բնորոշ պահվածքը, ծեծկռտուքն ու դանակով հարց լուծելու տեսարանները քննադատության ալիք են բարձրացրել համացանցում։ Factor TV-ն նախ կապ հաստատեց Գոռ Վարդանյանի հետ, որը հրաժարվեց պատասխանել մեր հարցերին՝ պայման առաջ քաշելով։
«Ֆիլմը մինչև ամբողջովին չնայեք, ոչ մի հարցի չեմ պատասխանի»,- ասաց Վարդանյանն ու անջատեց հեռախոսը։
Սերիալը դաստիարակչական նպատակ ունի․ Factor TV-ի հարցադրումներին ի պատասխան՝ ասաց «Կայսրության թևերը» սերիալի դերասաններից Գագիկ Սարգսյանը, որի որդին նույնպես նկարահանվել է այս սերիալում։
Մասնագետները, սակայն, մտահոգված են ֆիլմերում և սերիալներում անչափահասների մասնակցությամբ նման տեսարանների խաղարկումից։ Մեդիաոգեբան Սաթեն Գրիգորյանի խոսքով՝ եթե նույնիսկ սերիալի ստեղծողները նպատակ ունեն դաստիարակել երեխաներին՝ սովորեցնելու նրանց, որ չի կարելի խնդիրները լուծել կռվի, ծեծուջարդի միջոցով, ավելի հավանական է, որ անչափահասներն էկրանին տեսածը կընդունեն որպես վարքի մոդել և կկրկնօրինակեն այն։
«Կայսրության թևերը» սերիալում կերպար մարմնավորող Գագիկ Սարգսյանը համաձայն չէ, որ անչափահասները կկրկնօրինակեն հատկապես բռնության տեսարաններն ու բառապաշարը։ Իսկ պատահե՞լ է, որ սերիալում նկարահանվելուց հետո իր երեխան կրկնօրինակի քրեական ենթամշակույթին բնորոշ վարք ու բարքը․ դերասանը համոզմունք հայտնեց, թե սերիալի պատճառով վիճաբանությունները չեն վերածվի դանակահարության։
«Բոլորը լավ են արձագանքել, բացատրել եմ, որ հանկարծ չմնա կերպարի տակ»,- ասաց դերասանը։
Ռեժիսոր Ռուբեն Բաբայանն ավելի կտրուկ է․ հանցագործություն է որակում երեխաներին նման տեսարաններում ներգրավելը և, նրա խոսքով, կա թյուր կարծիք, որ քրեական բառապաշարն ուժի նշան է։
Հոգեբան Սաթեն Գրիգորյանի խոսքով՝ մեդիան է այսօր ձևավորում օրակարգ, գեներացնում տարբեր արժեքներ և նպաստում վարքային մոդելի կրկնօրինակմանը։ Ըստ նրա՝ աշխարհի տարբեր երկրներում, այդ թվում՝ Հայաստանում հանցագործություն կատարած երեխաները հաճախ խոստովանում են, որ դրա ձևն ու բովանդակությունը տեսել և սովորել են մեդիայից։
Մանրամասները՝ տեսանյութում։
Արփի Հակոբյան
