08.06.2026 | 02:28
ՔՊ-ն միանձնյա կձևավորի կառավարություն. Փաշինյան
Գանձագողերը վնասում են Էրզրումի Սուրբ Մինաս հայկական եկեղեցին
Մշակույթ
10.07.2019 | 13:22
Կարինում (Էրզրում) 1790-ականներից մինչև մեր օրեր հասած հայկական պատմական Սուրբ Մինաս եկեղեցում գանձագողերն այլևս չփորված տեղ չեն թողել, իսկ եկեղեցու շրջակայքում ապօրինի շինարարություն է կատարվում. գրում է ermenihaber-ը:
Թուրքական աղբյուրի փոխանցմամբ՝ ներկայիս Թուրքիայի հյուսիսարևելյան Էրզրում նահանգի Ազիզիյե գավառում գտնվող հայկական եկեղեցում գանձ որոնողները, հայերի ոսկիները գտնելու մոլուցքով տարված, ապօրինի հորատումներ են անում:
Նշվում է, որ Ազիզիյեի շրջանի ղեկավարությունը դիմել է գերմանաբնակ հայ Սաբրի Էրգինին, ում պատկանում է այդ եկեղեցին, սակայն վերջինս համաձայնություն չի տվել այն վերականգնելու համար:
«Եկեղեցին, որն իր սեփականատիրոջ պահանջով չի վերականգնվում, դարձել է գանձագողերի ապաստարան: Իսկ տեղի բնակիչները ցանկանում են վերականգնել եկեղեցին կամ մաքրել նրա շրջակայքը»,- հայտնում է աղբյուրը:
Նշենք, որ եկեղեցու սեփականատեր Սաբրի Էրգինը տարիներ առաջ հայտնել էր, որ եկեղեցին մեծ նշանակություն է ունեցել իր մոր համար, որն ամեն ջանք գործադրել էր եկեղեցու պահպանության համար: Խոսելով մոր երազանքի մասին՝ Էրգինն ասել էր. «Մայրս ցանկանում էր, որ այն ծառայի ժողովրդին որպես մշակութային կենտրոն կամ գրադարան ու դառնա հայ և թուրք ժողովուրդների խաղաղության խորհրդանիշը»:
