06.10.2026 | 17:17
Նովակ Ջոկովիչը տիտղոս նվաճեց մի մրցաշարում, որտեղ երբեք չի պարտվել. ՏԵՍԱՆՅՈՒԹ
Ֆրանսիայում թանգարանից գողացել են 150 կիլոգրամանոց «Ապոկալիպսիսի գրքի» բրոնզե կազմը, որը ստեղծել է Սալվադոր Դալին
Քաղաքականություն
06.10.2026 | 16:40
Ֆրանսիական Իսուար քաղաքի թանգարանից գողացել են Ժոզեֆ Ֆորեի «Ապոկալիպսիսի գիրքը» ստեղծագործության բրոնզե կազմը, որը պատրաստել է Սալվադոր Դալին։ Ոստիկանությունը դեռևս չի կարողանում բացատրել, թե ինչպես են գողերը կարողացել աննկատ դուրս բերել այդքան ծանր առարկան։ Կազմը կշռում է շուրջ 150 կիլոգրամ, իսկ ամբողջ գիրքը՝ 210 կիլոգրամ, փոխանցում է Meduza-ն։
«Ապոկալիպսիսի գիրքը» ստեղծվել է 1960 թվականին՝ Հովհաննես Աստվածաբանի Հայտնության գրքի հիման վրա։ Գրքի ստեղծման աշխատանքներին մասնակցել են 14 նկարիչներ և գրողներ, այդ թվում՝ Սալվադոր Դալին, Ժան Կոկտոն և Ժան Ժիոնոն։
Գիրքը ներառում է ոչխարի կաշվից պատրաստված 150 մեծ թերթ։ Ստեղծագործության տեքստը ձեռագիր է, իսկ 550 սկզբնատառեր պատված են ոսկով։ Բրոնզե կազմը զարդարված է ոսկով և թանկարժեք քարերով։ Ստեղծման պահին «Ապոկալիպսիսը» համարվում էր աշխարհի ամենածանր և ամենաթանկ գիրքը։ Դրա արժեքը գնահատվում էր երկու միլիոն ֆրանկ։
1961-1972 թվականներին գիրքը ցուցադրվել է աշխարհի տարբեր երկրներում կազմակերպված գրեթե 150 ցուցահանդեսների ժամանակ։ Հետագայում այն պահվել է Շվեյցարիայում, իսկ 2003 թվականին ֆրանսիացի կոլեկցիոներ Քրիստիան Կարուցոսն այն գնել է ճապոնացի սեփականատերերից, որոնք ցանկանում էին գիրքը վաճառել մաս-մաս։ Այդ ժամանակից ի վեր գիրքը ցուցադրվում է Իսուարում։
Վերջին մեկ տարվա ընթացքում Ֆրանսիայում մի քանի խոշոր թանգարանային կողոպուտներ են տեղի ունեցել։ Անցյալ տարվա հոկտեմբերին գողերը Լուվրից դուրս էին բերել կայսերական հավաքածուի 88 միլիոն եվրո արժեքով զարդեր։ Ավելի ուշ պարզվել էր, որ գողացված արժեքներն ապահովագրված չեն եղել։
2026 թվականի հուլիսին հանցագործները Վինժեն-սյուր-Մոդեր քաղաքում գտնվող Lalique թանգարանից գողացել էին շուրջ 20 ցուցանմուշ։ Պատճառված վնասը գնահատվել էր 4 միլիոն եվրո։ Թեև թանգարանում ահազանգման համակարգը գործել է, ժանդարմները կողոպուտի մասին տեղեկացել էին հավաքարարից։ Մեկ ամիս առաջ՝ սեպտեմբերի 8-ին, ֆրանսիական Կան-սյուր-Մեր քաղաքում գտնվող իմպրեսիոնիստ Օգյուստ Ռենուարի թանգարանից գողացել էին շուրջ 9 միլիոն եվրո ընդհանուր արժեքով չորս նկար։
Թարգմանությունը՝ Էմմա Չոբանյանի
