02.09.2026 | 22:49
Հարսանիքի ժամանակ տունը թալանել են․ բացահայտվել է բնակարանային 6 գողություն
Թբիլիսիում ցույցերը ցրելու հետևանքով ավելի քան 50 մարդ է տուժել. Սալոմե Զուրաբիշվիլին իրավիճակի համար Մոսկվային է մեղադրում. ԼՈՒՍԱՆԿԱՐՆԵՐ
Քաղաքականություն
21.06.2019 | 14:59
Թբիլիսիում ցուցարարների և իրավապահների միջև բախումների հետևանքով, նախնական տվյալներով, առնվազն 52 մարդ է տուժել, այդ թվում՝ 38 ոստիկան: Ակցիայի մասնակիցներից բացի՝ վիրավորվել է 12 լրագրող, օպերատոր և լուսանկարիչ:
Վրաստանի մայրաքաղաքում, հիշեցնենք, լարված իրավիճակ է ստեղծվել հինգշաբթի խորհրդարանում տեղի ունեցած միջադեպից հետո: Թբիլիսիում անցկացվել է Ուղղափառության միջխորհրդարանական ասամբլեայի Գլխավոր նստաշրջանը, որին մասնակցելու նպատակով, ի դեպ, Վրաստանում է նաև հայկական խորհրդարանական պատվիրակությունը: Ռուսական պատվիրակության ղեկավար Սերգեյ Գավրիլովը նստաշրջանը բացել է՝ Վրաստանի խորհրդարանի խոսնակի աթոռին նստած: Սա առաջացրել է ընդդիմադիր «Միացյալ ազգային շարժման» և «Եվրոպական Վրաստանի» ներկայացուցիչների դժգոհությունը:
Ընդդիմադիր պատգամավորները, ի նշան բողոքի, դուրս են եկել դահլիճից, նիստն ընդհատվել է: Դրանից հետո խորհրդարան են ներխուժել մի շարք ակտիվիստներ: Գավրիլովի պնդմամբ՝ նրանք ջուր են լցրել իր վրա և փորձել խլել փաստաթղթերը: Ակցիայի մասնակիցները նաև պահանջել են, որպեսզի ռուսական պատվիրակությունն անհապաղ հեռանա Վրաստանից:
Սերգեյ Գավրիլովը պարզաբանել է, թե ինչպես է հայտնվել Վրաստանի խորհրդարանի խոսնակի աթոռին: «Ասամբլեայի բացման ժամանակ մենք շնորհակալություն հայտնեցինք Վրաստանին՝ հյուրասիրության և միջոցառման լավ կազմակերպման համար: Հունիսի 20-ին մեզ հրավիրեցին խորհրդարանի շենք: Վրացական կողմն առաջարկեց զբաղեցնել խորհրդարանի խոսնակի տեղը: Տանտերերն ուր հրավիրում են, այնտեղ էլ զբաղեցնում եմ տեղը»,- Aliq.ge-ի փոխանցմամբ՝ ասել է ռուս պատգամավորը:
Խորհրդարանի շենքի մոտ՝ Թբիլիսիի Ռուսթավելի պողոտայում, բազմահազարանոց ակցիա է մեկնարկել, որի մասնակիցները փորձել են գրոհով վերցնել խորհրդարանի շենքը: Անկարգություններ են գրանցվել նաև քաղաքի այլ հատվածներում, այդ թվում՝ մետրոյի կայարաններից մեկում: Վրացական «Առաջին ալիքի» փոխանցմամբ՝ ակցիայի մի քանի մասնակիցներ ներխուժել են Ռուսթավելի պողոտայում գտնվող իշխող «Վրացական երազանքի» գրասենյակ, այրել կուսակցության դրոշը:
Ցույցը ցրելու համար իրավապահներն արցունքաբեր գազ, ջրցան մեքենաներ և ռետինե փամփուշտներ են կիրառել: Ոստիկանությունը նաև շուրջ 200 քաղաքացու է բերման: Նրանց մի մասն արդեն ազատ է արձակվել, մի քանիսն էլ վարչական պատասխանատվության է ենթարկվել՝ 12-օրյա ազատազրկման՝ ոստիկանների հրահանգներին չենթարկվելու համար:
Վրացական ընդդիմությունը պահանջել է խորհրդարանի խոսնակ Իրակլի Կոբախիձեի և ՆԳ նախարար Գեորգի Գախարիայի հրաժարականը՝ նրանց մեղադրելով միջադեպի համար: Մինչ այդ, Վրաստանի նախագահ Սալոմե Զուրաբիշվիլին Թբիլիսիի ակցիաների ֆոնին հայտարարել, որ Ռուսաստանը շահագրգռված է Վրաստանում ներքին դիմակայություն ապահովելու հարցում,- գրում է ՌԻԱ Նովոստին:
«Ռուսաստանն օկուպանտ է և մեր թշնամին: Նրա կողմից ղեկավարվող հինգերորդ շարասյունը, հնարավոր է, այսօր ավելի վտանգավոր կարող է լինել, քան բացահայտ ագրեսիան: Կցանկանայի ևս մեկ անգամ ասել, որ երկրի ու հանրության ճեղքումն ու ներքին դիմակայությունը ոչ ոքի ձեռնտու չէ՝ Ռուսաստանից բացի, և այսօր դա նրա ամենափորձված զենքն է»,- Facebook-ում գրել է Զուրաբիշվիլին: Ի դեպ՝ Բելառուսում գտնվող Վրաստանի նախագահն ընդհատել է այցը և պատրաստվում է հայրենիք վերադառնալ:
Ռուսաստանի ԱԳՆ-ն արձագանքել է Թբիլիսիում տեղի ունեցածին: «Ուղղափառության միջխորհրդարանական վեհաժողովը, որի նիստի անցկացումը Թբիլիսիում ծրագրված էր երկար ժամանակ առաջ, ընդդիմության ռադիկալ մասն օգտագործեց այն բանի համար, որպեսզի անկարգություններ առաջացնի փողոցում»,- հայտարարել է ՌԴ ԱԳ փոխնախարար Գրիգորի Կարասինը: Նրա խոսքով՝ սա ևս մեկ անգամ ցույց է տալիս «վրացի քաղաքական գործիչների ռադիկալ մասի էմոցիոնալ վերաբերմունքը, որն ամեն ինչ անում է, որպեսզի խանգարի Մոսկվայի և Թբիլիսիի միջև հարաբերությունների կարգավորմանը»:
