18.07.2026 | 16:19
Սպասվում է կարճատև անձրև և ամպրոպ
COP-ի համար Բաքվում նավթարդյունահանման տարածքները թաքցրել են պատերի հետևում, մինչդեռ մարդիկ բնակվում են մազութով ծածկված խոնավ տներում
Քաղաքականություն
15.11.2024 | 22:57
Մինչ Բաքվում ընթանում է ՄԱԿ-ի կլիմայական գագաթնաժողովը, Ադրբեջանի մայրաքաղաքի նավթի արդյունահանման տարածքները Զաբրատ ճանապարհի վրա թաքցվում են պատերի հետևում: Այս պատերի վերանորոգումը ներառվել է COP29-ի նախաշեմին Բաքվում իրականացված բարեկարգման աշխատանքների ծրագրում, հայտնում է ադրբեջանական Meydan TV-ն։
Ադրբեջանը, որի տնտեսությունը կախված է նավթից, ցանկանում է ՄԱԿ-ի կլիմայական համաժողովի շրջանակում հավակնոտ երևալ կանաչ քաղաքականությանն անցնելու հարցում։
Մինչ Բաքվի կենտրոնական փողոցները զարդարված են կանաչապատ տարածքներով, նավթային արդյունաբերության սրտում՝ նավթային հարթակների շարքում, մարդիկ ապրում են մազութով ծածկված խոնավ տներում, տարածվող ուժեղ հոտերի և հիվանդությունների վտանգի պայմաններում։
Լրատվամիջոցը նշում է, որ Զաբրատ-6 հանքավայրում կոյուղու համակարգ չկա. բնակիչները սեփական միջոցներով խողովակներ են անցկացրել իրենց տներում: Պարբերական անձրևները մազութը լցնում են տները։ Նրանք չեն կարողանում հեռացնել մազութի հոտը թոքերից, իսկ բծերը՝ տներից։
Բնակիչները բողոքել են, որ տարիներ շարունակ իրենց ասել են, որ կտեղափոխվեն նավթով աղտոտված տարածքներից։ Սակայն տեղափոխման վերաբերյալ վերջնական որոշում չի կայացվում։ Փաստաթղթեր չունեցող տներում ապրողներին թույլ չեն տալիս վերանորոգել խոնավությունից վնասված բնակարանները։
Ադրբեջանի Բնապահպանության և բնական պաշարների նախարարության տեղեկատվության համաձայն՝ գույքագրման հիման վրա պարզվել է, որ Աբշերոնի մոտ 1000 հա հողատարածք աղտոտված է նավթով։ Ամենաաղտոտված տարածքներն են Բալախանին, Սուրախանին, Սաբունչին։
Անցյալ տարի էկոլոգիայի և բնական պաշարների նախարարի խորհրդական Ռասիմ Սաթերզադեն հայտարարել էր, թե կառավարությանն առաջարկվել է պատրաստել 2024-2030 թվականների նոր պետական ծրագիր Բաքվում նավթով աղտոտված տարածքների համար։ Գործնական քայլեր, սակայն, դեռևս չեն արվել։
Թարգմանությունը՝ Էմմա Չոբանյանի
