29.03.2026 | 22:16
Հրդեհ ավտոմեքենայում․ տուժածներ չկան
Ստեփանակերտի և Երևանի միջև դիմակայումը չեմ բացառում. Արա Պապյան. ՏԵՍԱՆՅՈՒԹ
Քաղաքականություն
21.05.2019 | 15:27
Դատաիրավական ոլորտը, որը, ըստ նախորդ տարիներին արված հարցումների, երկրում ամենակոռումպացվածն է, լուրջ խնդիրների առջև է կանգնեցրել մեզ բոլորիս և դարձել երկրի միահեծան տերը: Ստացվում է, որ այդ 300 դատավորներն են որոշում՝ ով է մեղավոր, ով՝ ոչ, և այս առումով վարչապետ Փաշինյանի երեկվա կոչը տեղին է և դեռ ավելի վաղ պետք է հղվեր։ Այսօր հրավիրված մամուլի ասուլիսում անդրադառնալով Նիկոլ Փաշինյանի երեկվա հայտարարությանը՝ այս մասին ասաց «Մոդուս Վիվենդի» հետազոտական կենտրոնի ղեկավար, քաղաքագետ Արա Պապյանը։
«Դատաիրավական ոլորտը դարձել է այն առանցքը, որի շուրջ համախմբվում է ռևանշիստական մի կուռ ուժ, որոնք չեն ուզում իրենց հնարավորությունները կորցնել։ Իհարկե, նրանց այդ ձգտումները փաթեթավորվում են հայրենասիրական զգացմունքներով, Արցախի հարցով, սակայն պետք է ասեմ, որ այդ մարդիկ, չներկայացնելով Արցախի շահերը, առաջնորդվում են սեփական շահերով: Նրանք մարդիկ են, որոնց կարողությունները մի քանի անգամ գերազանցում են իրենց օրինական եկամուտները, ինչը հարցեր է առաջացնելու: Հետևաբար՝ կարծում եմ, որ բոլոր զտումները պետք է սկսել Արցախից, որովհետև Արցախը մեր առաջնագիծն է»,- ասաց Արա Պապյանը։
Նրա համոզմամբ՝ առաջիկայում պետք է ականատես լինենք որոշակի զարգացումների, որովհետև այն, ինչ հայտարարվել է երեկ, պետք է շատ արագ կյանքի կոչել:
Քաղաքագետի պնդմամբ՝ չի բացառվում, որ կարող է տեղի ունենալ դիմակայում Ստեփանակերտի և Երևանի միջև. «Շեշտում եմ՝ ես չեմ ասում՝ Արցախի և Հայաստանի, ասում եմ՝ դիմակայում Ստեփանակերտի և Երևանի միջև, և այս ամենի լուծումը միասնությունն է, որին էլ ուղղված է նաև «Սասնա Ծռեր» կուսակցության ավտոերթը դեպի Արցախ. միասնության գաղափարն ենք տանում»:
Մանրամասները՝ տեսանյութում։
Աղավնի Սուքիասյան
