Որ չստացվի այնպես, որ մարդը գառ մորթի, գնանք քրգործ հարուցենք․ կենդանիների նկատմամբ դաժան վերաբերմունքը քրեականացնելու համար հստակ չափանիշներ են պետք․ Փաշինյան․ ՏԵՍԱՆՅՈՒԹ

Ազգային ժողովի «Բարգավաճ Հայաստան» խմբակցության մի խումբ պատգամավորներ Կառավարության հավանությանն  են ներկայացրել օրենսդրական նախաձեռնություն, որով առաջարկվում է Քրեական օրենսգիրքը լրացնել նոր հոդվածով, ինչի արդյունքում կքրեականացվի կենդանիների նկատմամբ դաժան վերաբերմունքը:

Ըստ  նախագծի՝ զեկուցող, արդարադատության նախարար Արտակ Զեյնալյանը նշեց, որ նախագծի հիմքում դրված մոտեցումն ընդունելի է, սակայն դրա վերաբերյալ առկա են հետևյալ դիտարկումները՝

նախագծում անհրաժեշտ է նախատեսել հանցակազմը ծանրացնող հանգամանքներ, որոնք պատասխանատվություն կնախատեսեն առավել բարձր հանրային վտանգավորության բնույթ և աստիճան ունեցող նմանատիպ արարքի համար և այս առումով առաջարկում են ՀՀ քրեական օրենսգրքի հոդվածի 2-րդ մասում, ի թիվս այլոց, նախատեսել հետևյալ ծանրացնող հանգամանքները.

-հանցանքը կատարվել է մի խումբ անձանց կողմից, առանձին դաժանությամբ,

-մանկահասակի ներկայությամբ,

-երկու կամ ավելի կենդանիների նկատմամբ և այլն:

Վարչապետ Նիկոլ Փաշինյանն էլ նախագծի վերաբերյալ նկատեց, որ պետք է հստակ ամրագրվի, թե կենդանիների նկատմամբ դաժան վերաբերմունք ասելով ինչ ենք հասկանում և շատ հստակ չափանիշներ մշակվի։

«Որ չստացվի այնպես, որ մարդը իր բակում, ծննդյան օրվա առիթով գառ է մորթում, գնանք գործ հարուցենք»,- ասաց  Փաշինյանը՝ նշելով, որ Կառավարությունը նախագծի հեղինակների հետ կաշխատի՝ առաջարկվող չափորոշիչները հստակ ամրագրելու համար։

Մանրամասները՝ տեսանյութում։