03.09.2026 | 16:00
«Հնարավորություն կա». Պուտինը՝ Ուկրաինայում պատերազմի խաղաղ կարգավորման մասին
Ամենավատն այն է, որ դա որպես կոմպրոմատ են ներկայացնում. Վահագն Հովակիմյանը՝ «Կենտրոն» ՀԸ-ում աշխատանք փնտրելու ԲՀԿ-ականի «մեղադրանքի» մասին. ՏԵՍԱՆՅՈՒԹ
Քաղաքականություն
18.04.2019 | 20:30
Factor.am-ի հարցազրույցն ԱԺ «Իմ քայլը» խմբակցության պատգամավոր Վահագն Հովակիմյանի հետ
– Պարո՛ն Հովակիմյան, այսօր ԱԺ-ն առաջին ընթերցմամբ ընդունեց Կառավարության կառուցվածքի մասին օրենքում փոփոխությունների նախագիծը: Դրա շրջանակում այս օրերի ընթացքում բուռն քննարկումներ էին, բայց այսօր, կարծես, բանը հասավ արդեն վիրավորանքների, հիշեցումների՝ նաև կապված նախկինում Ձեր գործունեության հետ: Ինչո՞ւ ԲՀԿ խմբակցության պատգամավորների հետ այսպիսի սուր հակամարտություն սկսվեց:
– Խորհրդարան է, որտեղ տարբեր կարծիքներ են բախվում, տարբեր կենսագրություններով մարդիկ են, բնական, բուռն քննարկումներ, բանավեճեր, կարծիքների, տեսակետների փոխանակում է: Իմ կարծիքով՝ սա նորմալ, բնական երևույթ է: Ավելի տարօրինակ է, երբ խորհրդարանում բոլորը, այսպես ասենք, միապաղաղ, նույն կարծիքն ունեն, ամեն ինչում համաձայն են:
– Դուք հիշեցրիք, որ ԲՀԿ խմբակցության, կուսակցության առաջնորդը ելույթներ չի ունեցել առհասարակ…
– Այն, ինչ հնչեց խորհրդարանի բանավեճին, ցանկություն չունեմ նորից բերել հարցազրույցի ֆորմատ: Եղել է բանավեճ, ասվել է այն, ինչ պիտի ասվեր, հնչել են փոխադարձ հայտարարություններ… Քանի որ իմ կենսագրության հետ կապված որոշակի, իբրև թե, բացահայտումներ փորձ արվեց անել, ես ուղղակի ասեմ, որ, մեղմ ասած, ճիշտ բան չի ասվում: Ճշմարտությունը նրանում է, որ 2015 թվականի ամռանը, երբ ես արդեն «Ժողովուրդ»-ում էի աշխատում՝ փոխխմբագիր էի, ես զուգահեռ ունեի հեղինակային հաղորդում ստեղծելու ծրագիր: Ու այդ ընթացքում մի քանի մասնավոր հեռուստաընկերությունների հետ բանակցել եմ, այդ թվում՝ հանդիպել եմ Իվետա Տոնոյանի հետ՝ այդ հաղորդումը «Կենտրոն» հեռուստաընկերությունում անելու հնարավորությունը քննարկելու նպատակով: Սա է եղել: Իրենք քննարկել են ծրագիրը, հետո ասել են՝ ոչ: Այսինքն՝ աշխատանք խնդրել… պիտի ասեմ, որ ես երբեք աշխատանք չեմ խնդրել:
– Իվետա Տոնոյանը, կարծես, սա Ձեզ ինչ-որ բան հիշեցնելու, հակադարձելու համար ասաց:
– Ամենավատն այն է, որ եթե նույնիսկ որևէ մեկն իրենցից աշխատանք է խնդրում, դա որպես կոմպրոմատ են ուզում օգտագործել:
– Ինչպե՞ս եք այդ քայլը գնահատում:
– Դա շատ վատ է, որովհետև չեմ կարծում, որ որևէ լրագրող, որը ժամանակին ցանկացել է «Կենտրոն»-ի հետ համագործակցել, ինչ-որ վատ բան է արել: Ուղղակի այսօրվա բանավեճերի ֆոնին, ինձ թվում է, ինձ խոցելու խնդիր էր դրված:
Հարցազրույցն ամբողջությամբ՝ տեսանյութում:
