Առաջարկում եմ արագ լուծել ԱԺ-ի դիմաց բողոքի ակցիա անողների խնդիրը. իրենց էլ ազատենք էդ հոգսից, մեզ էլ․ Բաբկեն Թունյան․ ՏԵՍԱՆՅՈՒԹ

Ազգային ժողովի տնտեսական հարցերի մշտական հանձնաժողովն այսօր դրական եզրակացություն տվեց «Աջակողմյան ղեկային տեղաբաշխմամբ տրանսպորտային միջոցների ներմուծումն արգելելու մասին» Հայաստանի Հանրապետության օրենքում փոփոխություն կատարելու մասին օրենքի նախագծին։

Հանձնաժողովի նախագահ Բաբկեն Թունյանը նշեց, որ Կառավարությունն այս քայլով ընդառաջ է գնում այն մարդկանց, որոնց մի մասը կումունիկացիաների հետ կապված, մյուս մասը՝ միտումնավոր, աջ ղեկով մեքենաներ է ներմուծել Հայաստան և Կառավարությունից այս առումով զիջման հնարավորություն է ստանալու առաջարկվող փոփոխություններով։

«Ամեն դեպքում ունենք 800 մեքենայի կուտակում, որի լուծման համար վաղը ԱԺ արտահերթ նիստ է հրավիրվելու։ Այս խնդիրները լուծելուց հետո քաղաքացիները հնարավորություն կունենան մինչև մայիսի 1-ը մեքենաներ ներմուծել Հայաստան։ Ակնկալում ենք, որ այս որոշումից հետո մենք այլևս նման իրավիճակ չենք ունենա, որ ինչ-որ մեկը կանգնի ասի՝ ես չգիտեի»,- ասաց Թունյանը՝ հավելելով․ «Առաջարկում եմ արագ լուծել էս խնդիրը, որի պատճառով մարդիկ Ազգային ժողովի դիմաց բողոքի ակցիա են անում․ իրենց էլ ազատենք էդ հոգսից, մեզ էլ»։

Նշենք, որ վաղը՝ մարտի 13-ին, Ազգային ժողովի արտահերթ նիստում «Աջակողմյան ղեկային տեղաբաշխմամբ տրանսպորտային միջոցների ներմուծումն արգելելու մասին» Հայաստանի Հանրապետության օրենքում փոփոխություն կատարելու մասին օրենքի նախագծի հարակից զեկուցողը կլինի ԱԺ «Իմ  քայլը» խմբակցության պատգամավոր, տնտեսական հարցերի մշտական հանձնաժողովի նախագահ Բաբկեն Թունյանը։

Մանրամասները՝ տեսանյութում։

Աղավնի Սուքիասյան